საქართველოს პრემიერ-მინისტრი მამუკა ბახტაძე, პრეზიდენტთან ერთად, ბათუმის ილია ჭავჭავაძის სახელობის სახელმწიფო დრამატული თეატრის რეაბილიტირებული შენობის ოფიციალური გახსნისადმი მიძღვნილ საპრემიერო სპექტაკლს დაესწრო. პრემიერაზე წარმოდგენილი იყო სპექტაკლი KLDIASHVILI.GE, რომელიც დავით კლდიაშვილის პიესის მიხედვით რეჟისორმა ანდრო ენუქიძემ დადგა.
თეატრის საზეიმო გახსნას აჭარის ავტონომიური რესპუბლიკის მთავრობის თავმჯდომარე, საკანონმდებლო ხელისუდლების წევრები, დიპლომატიური კორპუსისა და თეატრალური საზოგადოების წარმომადგენლები დაესწრნენ.
ბათუმის ილია ჭავჭავაძის სახელობის სახელმწიფო დრამატული თეატრის უპრეცედენტო სარეაბილიტაციო სამუშაოები ფონდმა „ქართუმ“ 14,5 მილიონი ლარით დააფინანსა. გასული საუკუნის 50-იან წლებში აშენებული ისტორიული შენობის უნიკალურ კედელს, ჭერის მხატვრობას, უნიკალურ ჭაღს, კაპიტელებს და სხვა მნიშვნელოვან დეტალებს რესტავრაციის შედეგად ავთენტურობა შეუნარჩუნდა. გარდა ამისა, თეატრში განათებისა და გახმოვანების თანამედროვე სისტემები და სცენის ახალი მექანიზმები დამონტაჟდა.
