აფხაზური და მეგრული აჯიკის დამზადების ტექნოლოგიას არამატერიალური კულტურული მემკვიდრეობის ძეგლის სტატუსი მიენიჭა, - განაცხადა კულტურული მემკვიდრეობის დაცვის ეროვნული სააგენტოს დირექტორმა ნიკა ანთიძემ.
„ძალიან მნიშვნელოვანი პროექტია, აფხაზური და მეგრული ტრადიციით აჯიკის დამზადებისთვის არამატერიალური მემკვიდრეობის ძეგლის სტატუსის მინიჭება და სხვათა შორის მე ხაზს გავუსვამ და პარალელს გავავლებ, როდესაც ჩვენ დამბალ ხაჭოს მივანიჭეთ კულტურული მემკვიდრეობის ძეგლის სტატუსი, ძალიან პოპულარულია და ერთ-ერთი მოთხოვნადი პროდუქტია“, – განაცხადა ნიკა ანთიძემ ტელეკომპანია რუსთავი 2-თან.
ანთიძემ იმედი გამოთქვა, რომ არამატერიალური ძეგლის სტატუსის მინიჭება ყველა ასეთი პროდუქტისთვის, რომელიც ქართულ იდენტობასთან არის დაკავშირებული, ხელს შეუწყობს მის პოპულარიზაციას.
უფრო ადრე არამატერიალური კულტურის ძეგლის სტატუსი მიენიჭა მსოფლიოში ცნობილ ქართული ტრადიციული სუფრის კულტურას, ღვინის ქვევრში დაყენების ტექნოლოგიას, ქართული დამწერლობის სამ სახეობას და ქართულ ჭიდაობას.
