27 სექტემბერს აფხაზეთიდან დევნილი ახალგაზრდების საინიციატივო ჯგუფი მართავს ხსოვნის მსვლელობას ჯუთაში, სახელწოდებით „ჩვენ ვინახავთ ჩვენი სახლის გასაღებს“.
მსვლელობა ეძღვნება 1993 წლის 27 სექტემბერს აფხაზეთში ჩატარებული ეთნიკური წმენდის შედეგად დევნილების მიერ საკენი-ჭუბერის უღელტეხილის გადმოლახვის 25 წლისთავს და ამ გადმოსვლის დროს დაღუპული ადამიანების ხსოვნას. აქციის მონაწილეები სიმბოლურად გაივლიან იგივე გზას ჯუთაში ჭაუხებთან, რაც აფხაზეთიდან დევნილებმა ჭუბერის უღელტეხილზე გაიარეს.
მსვლელობა დაიწყება ჯუთაში განლაგებულ ბანაკ „მეხუთე სეზონის“ მიმდებარე ტერიტორიიდან 14:00 საათზე და გაემართება ჭაუხების მიმართულებით პატარა ტბამდე. შემდეგ იმავე დღეს დასრულდება ჯუთაში, რის შემდეგაც მონაწილეები თბილისში დაბრუნდებიან. აქციის მონაწილეებს ეცმევათ სპეციალური მაისურები და ყველას თან ექნება აფხაზეთში დარჩენილი თავიანთი სახლის გასაღები. აქციის მთავარი მიზანია: 1993 წლის 27 სექტემბერს აფხაზეთში მომხდარი ამბების ხსოვნა და დაღუპული მშვიდობიანი მოქალაქეებისადმი პატივის მიგება მათი გახსენებით, ასევე 25 წლიანი დევნილობის გაპროტესტება და აფხაზეთში მშვიდობიანი დაბრუნების სურვილის დაფიქსირება.
