ბათუმის საჭადრაკო ოლიმპიადის დაწყებამდე ორი დღე დარჩა. 23 სექტემბრიდან 5 ოქტომბრის ჩათვლით ბათუმის ახალი სპორტის სასახლე 180 ქვეყნის 4000-მდე მონაწილეს მიიღებს. 23 სექტემბერს, 21:00 საათზე “ბლექსი არენაზე“ გაიმართება ოლიმპიადის გახსნის გრანდიოზული ცერემონია.
სასახლეც და საორგანიზაციო კომიტეტიც ოლიმპიადის მისაღებად სრულ მზადყოფნაშია. ბათუმში, ოლიმპიადაზე სათამაშოდ თითქმის ყველა წამყვანი მოჭადრაკე ჩამოვა - როგორც ვაჟთა, ისე ქალთა შორის. მათ შორის მსოფლიოს ჩემპიონები სხვადასხვა წლებში: ალექსანდრა კოსტენიუკი, მარია მუზიჩუკი, ანა უშენინა, ვლადიმირ კრამნიკი, ვიშვან ანანდი, რუსლან პონომარიოვი. მსოფლიოს რეიტინგ-სიის ტოპ-მოჭადრაკეები: ფაბიანო კარუანა, ჰიკარუ ნაკამურა, სერგეი კარიაკინი, ვასილი ივანჩუკი,ლევონ არონიანი, ბორის გელფანდი და სხვები.
ბათუმში ჩამოსვლას აპირებდა ვაჟთა შორის მსოფლიო რეიტინგის ლიდერი, ნორვეგიელი მაგნუს კარლსენი, მაგრამ ბოლოს გადაწყვეტილება შეცვალა და აქცენტი მსოფლიოს ჩემპიონის ტიტულისთვის ბრძოლაზე გააკეთა. 9 ნოემბერს, ლონდონში დაიწყება მატჩი კარლსენსა და ამერიკელ ფაბიანო კარუანას შორის, რომელიც მსოფლიოს ჩემპიონის ვინაობას გამოავლენს. კარუანა მსოფლიოს რეიტინგში მეორე ადგილზეა, როგორც აღვნიშნეთ ნოემბერში კარლსენს მსოფლიოს ჩემპიონის ტიტულს შეეცილება, მანამდე კი ბათუმში ჩამოვა და ამერიკის ნაკრებთან ერთად საჭადრაკო ოლიმპიადის მოსაგებად იბრძოლებს.
ბათუმში ქალთა შორის მსოფლიოს პირველი ნომერი, ჩინელი ჰაუ იფანიც ვერ ჩამოვა, თუმცა ტოპ-10-ეულის თითქმის ყველა წარმომადგენელი ახალ სპორტის სასახლეში მედლებისთვის ითამაშებს. მთლიანობაში, ბათუმი ორი კვირის განმავლობაში საჭადრაკო სამყაროს 30-მდე ვარსკვლავს უმასპინძლებს, რომლებმაც სხვადასხვა დროს არაერთი ტიტული მოიპოვეს და ახლაც საკუთარი ქვეყნის ნაკრებების ლიდერები და მთავარი ვარსკვლავები არიან. საქართველოს ქალთა და ვაჟთა ნაკრებებიდან საუკეთესო რეიტინგი, გუნდის ლიდერებს ნანა ძაგნიძეს და ბულგარელ ივან ჩეპარინოვს აქვთ - ძაგნიძე მსოფლიოს რეიტინგში საპატიო მე-11 ადგილზეა და ათეულის სხვა მოთამაშეებს მინიმალური სხვაობით ჩამორჩება. 30-ე პოზიციაზეა ჩეპარინოვი, რომელიც ამ ოლიმპიადაზე საქართველოს ნაკრების სახელით ითამაშებს.
