ხორავას ქუჩაზე მომხდარი მკვლელობის საქმის ფარგლებში მოწმეზე ზემოქმედების ბრალდებით დაკავებული მერაბ მორჩაძე საავადმყოფოში გადაიყვანეს. ამის შესახებ ჟურნალისტებს მისმა ადვოკატმა, გაგი მოსიაშვილმა განუცხადა.
"ამ წუთებში გახდა ჩემთვის ცნობილი, რომ ბატონი მერაბ მორჩაძე გადაყვანილია სამედიცინო დაწესებულებაში მისი ჯანმრთელობის მდგომარეობის გაუარესების გამო.
სამწუხაროდ, არ ვიცი გაგრძელდება თუ არა, ან ჩატარდება თუ არა სასამართლო პროცესი. დღეს არის წინა სასამართლო სხდომა, დაცვის მხარე სასამართლოში წარვადგენთ იმ ინფორმაციას, რომელიც მერაბ მორჩაძის უდანაშაულობას ამტკიცებს წარდგენილ ბრალთან მიმართებაში", - აცხადებს მოსიაშვილი.
შეგახსენებთ, 1973 წელს დაბადებული მერაბ მორჩაძე 8 ივნისს სსკ-ის 372-ე მუხლით დააკავეს, რაც მოწმეზე ზემოქმედებას გულისხმობს. საუბარია საქმის ერთ-ერთ მთავარ მოწმე მ.კ-ზე. გამოძიების ინფორმაციით, მორჩაძემ მას ურჩია, არ მიეცა ბრალდებულების წინააღმდეგ ჩვენება, მკვლელობიდან თვენახევარში კი მას ამის სანაცვლოდ თანხა 100 ლარის ოდენობით გადასცა.
