ხორავას ქუჩაზე მოკლული არასრულწლოვნის, დავით სარალიძის მამა, ზაზა სარალიძე ხელისუფლებას უნდობლობას უცხადებს და ვადამდელი არჩევნების მოთხოვნით, შიმშილობას იწყებს. აღნიშნულის შესახებ ზაზა სარალიძემ პარლამენტთან მიმდინარე აქციაზე განაცხადა, რომელიც დღეს განახლდა.
„მე აქ ვიქნები მანამ, სანამ სამართლიანობა არ აღდგება ამ ქვეყანაში. ჩემი კონკრეტული მოთხოვნა არის, ხელისუფლება გადადგეს. არავითარი წულუკიანი, არავითარი გახარია, ხელისუფლრბა გადადგეს, იმიტოპმ რომ ისინი მფარეველობენ ამ მკვლელობებს არა მარტო ჩვენი შვილებისას, არამედ ჩვენ დავინახეთ რამდენი ადამიანი, რამდენი შვილი მოკლეს. დღეს კობაძიძე გამოდის ად ამბობ - ადამიანის უფლებებს ვიცავთო. ჩემი შვილი რადგან მიწაშია, უფლებები აღარ აქვს? მე ჩემი მკვადარი შვილის უფლებებს დავიცავ, ღირსებას დავიცავ და ჩემი ცოცხალი შვილის მომავალს დავიცავ. აქ ვიქნები მანამ, სანამ ჩვენი მოთხოვნები არ შესრულდება - ხელისუფლება გადადგეს. შეიქმნას დროებითი ხელისუფლება და აუცილებლად დაიწყოს მსჯელობა ვადამდელ საპარლამენტო არჩევნებზე. იმიტომ რომ დღეს ხელისუფლება მკვლელია. მე, დღეს, ზაზა სარალიძე, ვჯდები რუსთაველზე და ვიწყებ შიმშილობას, სანამ ჩვენი მოთხოვნები არ შესრულდება“, - განაცხადა სარალიძემ.
პარლამენტთან მიმდინარე აქციები ზაზა სარალიძემ 11 ივნისს, ხორავას ქუჩაზე არასრულწლოვნების მკვლელობის საქმეზე, პარლამენტის დროებითი საგამოძიებო კომისიის შექმნის შემდეგ შეწყვიტა.
