უკრაინასა და საქართველოს შორის მიმოსვლა ID ბარათებით იქნება შესაძლებელი, - ამის შესახებ ინფორმაციას საზოგადოებრივი მაუწყებელი უკრაინული სააგენტო „უნიანიზე“ დაყრდნობით ავრცელებს.
არსებული ინფორმაციით, შესაბამისი შეთანხმების გაფორმებას მხარეები ნიუ იორკში, გაერო-ს გენერალური ასამბლეის სესიაზე ორი ქვეყნის დელეგაციების ვიზიტისას აპირებენ.
საქართველოში უკრაინის ელჩის, იგორ დეოლგოვის განცხადებით, უკრაინულმა მხარემ უკვე დაამტკიცა და ქართველ კოლეგებს გადასცა დოკუმენტები ბიომეტრიული შიდა პასპორტებით (ID ბარათებით) მიმოსვლის შესახებ შეთანხმების გასაფორმებლად.
„ჩვენ დაგვიდასტურეს, რომ შიდა პასპორტებით მოქალაქეების მგზავრობის შესახებ შეთანხმების ტექსტი უკვე შეთანხმებულია უკრაინის შესაბამისი უწყებების მიერ. ეს ტექსტი უკვე ოფიციალურად გადაეგზავნა საქართველოს საგარეო საქმეთა სამინისტროს. ახლა მთავრობამ უნდა მიიღოს გადაწყვეტილება ხელმოწერის შესახებ და განსაზღვრულ პირს ამ შეთანხმების ხელმოწერის უფლებამოსილება დააკისროს“, – განაცხადა დოლგოვმა.
