ეროვნული სატყეო სააგენტო სამცხე-ჯავახეთის რეგიონში წიწვოვან კორომებში გავრცელებული მავნებელი მწერის - მბეჭდავი ქერქიჭამიას წინააღმდეგ ბრძოლის ღონისძიებებს აგრძელებს. 2018 წელს, სამცხე-ჯავახეთის წიწვოვან კორომებში 2000 ცალი ფერომონიანი მწერსაჭერი განთავსდა. წიწვოვანი კორომების მასიური ხმობა სამცხე-ჯავახეთში 2011 წლისთვის გამოვლინდა. ეროვნული სატყეო სააგენტო უკვე მე-5 წელია მავნებელთან ბრძოლის ღონისძიებებს, სანიტარიული ჭრებისა და ფერომონიანი მწერსაჭერის გამოყენებით ახორციელებს.
გატარებული ღონისძიებების შედეგად, მავნებლის ინტენსივობა შემცირებულია. ამ ეტაპზე, მავნე მწერის ინტენსიურად გავრცელების კერებში განთავსებული ფერომონიანი მწერსაჭერების მორიგი მონიტორინგი მიმდინარეობს. ფერომონების შემოწმება და დაჭერილი ხოჭოების განადგურება 10 დღეში ერთხელ ხდება.
ეროვნული სატყეო სააგენტოს ენტომოლოგები ტყეების სანიტარულ მდოგმარეობაზე დაკვირვებას უწყვეტ რეჟიმში ახორციელებენ. შეფასებაზე დაყრდნობით იგეგმება შესაბამისი ღონისძიებები. მბეჭდავი ქერქიჭამია (Ips typographus) საქართველოში პირველად 1952 წელს გამოჩნდა. ყველაზე დიდი ზიანი მავნებელმა სამცხე-ჯავახეთის რეგიონს, ბორჯომის ხეობას მიაყენა.
