აჭარის მთავრობის თავმჯდომარემ თორნიკე რიჟვაძემ, აჭარის უმაღლესი საბჭოს თავმჯდომარესთან დავით გაბაიძესთან, მინისტრთა კაბინეტის წევრებთან და ქალაქის მერთან ერთად შინდისის გმირების სკვერში სოფელ შინდისთან დაღუპული გმირების ხსოვნას პატივი მიაგო.
მთავრობის წარმომადგენლებმა შინდისის გმირების ხსოვნისადმი მიძღვნილი მემორიალური დაფა ყვავილებით შეამკეს. სკვერში დაღუპულთა სულების მოსახსენიებელი პანაშვიდი აღევლინა. შინდისთან დაღუპული 17 გმირის სახელზე პარკში ხეები დაირგო. შინდისის სკვერში გმირების სახელზე ხეებს ტრადიციულად ყველა წელს რგავენ.
2008 წლის 11 აგვისტოს, სოფელ შინდისის სარკინიგზო სადგურთან საქართველოს შეიარაღებული ძალების II ქვეითი ბრიგადის საინჟინრო ოცეული რუსულ მოტომსროლელ ასეულთან უთანასწორო ბრძოლაში ჩაება. ქართველი ჯარისკაცების მიმართულებით მტერი თითქმის ყველა სახის იარაღიდან ისროდა, მათ შორის ტანკებიდან და რეაქტიული ცეცხლმტყორცნებიდან და მიუხედავად იმისა, რომ მოწინააღმდეგემ ორჯერ გამოიძახა დახმარება, ჩვიდმეტმა ქართველმა მებრძოლმა მტერს მედგარი წინააღმდეგობა ბოლომდე გაუწია და გმირულად დაიღუპა. შინდისის გმირების სახელობის პარკი ოთხ ჰექტარზეა გაშენებული. სკვერის მშენებლობისთვის ქალაქის ბიუჯეტიდან 1 მილიონ 902 ათასი ლარი დაიხარჯა.
