სმიტების ოჯახის დახოცვაში ბრალდებულ მალხაზ კობაურის ადვოკატი, დავით გირგვლიანი „ჯი-ეიჩ-ენთან“ საქმეში არსებულ ახალ დეტალზე საუბრობს. როგორც ის აცხადებს, სმიტების ოჯახს მკვლელობის დღეს სავარუდოდ, ნაცნობები შეხვდნენ, რომელთა დანახვამაც მოკლული მამაკაცი შეაშინა.
„საქმეში შავი ფერის ავტომობილი და კავკასიური წარმოშობის ორი ადამიანი ფიგურირებს, მათ ქართული ენა იცოდნენ. მაიკლ სმიტი მას სავარაუდოდ, იცნობდა, რადგან მათმა დანახვამ მაიკლი შეაშინა და ააღელვა, რის გამოც, მან ნაბიჯიც კი ააჩქარა. ერთ-ერთ მათგანს მაიკლ სმიტი ცალკე გაჰყავს და რაღაც თემაზე ესაუბრება. ამ ყველაფერს მწყემსი თავის თვალით ხედავდა. შემდეგ ის გახდა შემსწრე, თუ როგორ მოკლა ამ ორმა ადამიანმა სმიტების ოჯახი. დაემუქრნენ, თუ ხმას ამოიღებ, ოჯახს ამოგიწყვიტავთო. სწორედ ამ ფაქტიდან გამომდინარე, მას ხმის ამოღების ეშინოდა“, - აცხადებს გირგვლიანი.
როგორც ის განმარტავს, ბრალდებულმა სამართალდამცავებსაც განუცხადა, რომ მკვლელი თვითონ არ არის, თუმცა, მათ ამის შესახებ არ დაიჯერეს.
„კობაური ამბობს, როცა გამოძიებისთვის ამ ინფორმაციის მიწოდება მინდოდა და ვუთხარი კიდეც, რომ მკვლელი არ ვარ, ლანძღვა, ჩხუბი დამიწყეს, მეუბნებდონენ, ჩვენ ვიცით შენ, რომ ხარ დამნაშავეო“, - აცხადებს ადვოკატი.
რაც შეეხება იმ ფაქტს, თუ როგორ მიიყვანა ბრალდებულმა ბავშვის ცხედართან სამართალდამცავები, ამ საკითხზე გირგვლიანი გამოძიების ინტერესებიდან გამომდინარე არ საუბრობს.
„ამაზე ვერ ვისაუბრებ და ვერც იმას დავადასტურებ, რომ ამან მიიყვანა სამართალდამცავები ცხედართან. დანარჩენ დეტალთან დაკავშირებით, გამოძიების ინტერესებიდან გამომდინარე ვერაფერს გეტყვით“, - აცხადებს ადვოკატი.
მიუხედავად აღიარებული ჩვენებისა, ბრალდებული მწყემსი ჩადენილ დანაშაულს აღარ აღიარებს. დაცვის მხარემ მისთვის აღკვეთის ღონისძიების სახით პატიმრობის შეფარდება უკვე გაასაჩივრა.
