მოწმემ ისაუბრა იმაზე, თუ როგორ შემოვიდა ახმედ ჩატაევი საქართველოში და ვისი დახმარებით, როგორ მოხდა მისი ჩამოყვანა თბილისში და რა მონაწილეობა ჰქონდათ ბრალდებულებს ამ საქმეში, - განაცხადა ჟურნალისტებთან ტერორიზმისა და ტერორისტების მხარდაჭერაში ბრალდებულების საქმის პროკურორმა, ნანა ხუნჯუამ.
როგორც ის განმარტავს, დღეს დაკითხული მოწმის ჩვენება ყველა ბრალდებულის მამხილებელია.
„მოწმის ჩვენება არის ყველა ბრალდებულის მამხილებელი ჩვენება, გარდა ერთისა, რომელთანაც არავითარი შეხება არ ჰქონია მას. საუბარია იმ ბრალდებულზე, რომელსაც ტერორიზმის ხელშეწყობა ედება ბრალად.
7 ბრალდებულს რამდენიმე მუხლით აქვს წარდგენილი ბრალი. შესაბამისად დღევანდელი მოწმის ჩვენება, სხვადასხვა დანაშაულებთან დაკავშირებით აძლევს სასამართლოს ინფორმაციას“, - აცხადებს ხუნჯუა.
ცნობისთვის, სუს-ის მიერ ჩატარებული სპეცოპერაციის შედეგად დაკავებული 6 პირიდან, 4- ს ბრალი ტერორისტებისთვის ხელშეწყობაში, ხოლო 2 პირს, ტერორისტული ორგანიზაციის წევრობაში ედება ბრალი.
