"33 ჭრილობიდან ყველა დანით არაა მიყენებული. არცერთი ემთხვევა ამ დანის ზომებს", - განაცხადა თემქაზე 20 წლის ანა ნაცვლიშვილის მკვლელობაში ბრალდებულის, ლადო გრიგალაშვილის ადვოკატმა, ნაირა ოტიაშვილმა. მისი განმარტებით, ნაცვლიშვილისთვის მიყენებული ჭრილობებიდან იმ დანას არცერთი ემთხვევა, რომელიც სამართალდამცავებმა ნივთმტკიცებად ამოიღეს.
ადვოკატის განმარტებით, დღეს წინასასამართლო სხდომაზე მოსამართლემ სრულად გაიზიარა ბრალდებისა და დაცვის მხარის მტკიცებულებები.
რაც შეეხება კითხვას, თუ რატომ აღიარა ლადო გრიგალაშვილმა საწყის ეტაპზე დანაშაული, ადვოკატი პასუხობს, რომ ეს დანაშუალის აღიარება არ იყო.
"აღიარებაც არ იყო. ეს იყო ფარული ვიდეო-აუდიო ჩაწერა, რომელსაც წინ უსწრებდა მამის მანქანის დათვალიერება. მამის მანქანაში პოლიცია რატომღაც წააწყდა დანას და მიიჩნია, რომ დანაშაული გახსნილად გამოეცხადებინა, ეს დანა კი ემცნო ნივთმტკიცებად. ამ დანასთან მიმართებაში ვერსია დაუმუშავადა. მიუხედავად, იმისა, რომ ჯერ ჩხრეკა არ იყო ჩატარებული და არც დანის ამოღება მომხდარა, წინასწარ გრიგალაშვილმა იცოდა, რომ მამის მანქანიდან ამოღებულ იქნა დანა. აბსოლუტრად დადასტურებული ეჭვია იმის, რომ წინასწარ უთხრეს, იმ შემთხვევაში, თუ შენ ამას ასე არ იტყვი, შესაბამისად, პასუხისმგებლობა შეტრიალდება იქით, რომ მამაშენის დანა ფიგურირებსო.
ფარული ჩანაწერით დასტურდება, რომ მან ეს იცის, მაშინ, როცა არ უნდა ცოდნოდა, დანის ამოღების თაობაზე", - განაცხადა ადვოკატმა.
მისივე ინფკრმაციით, გამოძიებამ შემთხვევის ადგილზე მიიყვანა ძაღლი, რომელიც ერთ-ერთი კორპუსის სადარბაზოსთან გაჩერდა. ადვოკატის თქმით, იქ არ ცხოვრობს ლადო გრიგალაშვილი.
"როდესაც შემთხვევის ადგილზე გამოძიებამ მიიყვანა ძაღლი, ცხელ კვალზე, შემთხვევის ადგილის დათვალიერებისას, ამ ძაღლმა შეასრულა გარკვეული ტრაექტორია, ჩავიდა გურამიშვილის მეტროსთან, შემდეგ უკან ამოტრიალდა და მივიდა 39-ე ბ კორპუსში, რომელიც არაა ლადო გრიგალაშვილის. ძაღლი გაჩერდა მეოთხე სადარბაზოსთან და იქიდან აღარ დაიძრა", - განაცხადა ნაირა ოტიაშვილმა. ადვოკატის თქმით, გამოძიებამ ამ სადარბაზოში არც ერთი პირი არ გამოკითხა“, - დასძინა ოტიაშვილმა.
სხდომის დასრულების შემდეგ ჟურნალისტებთან კომენტარი არ გაუკეთებია საქმის პროკურორს, გრიგოლ ბიბილაშვილს.
პროცესის დასრულების შემდეგ, შელაპარაკება მოხდა მოკლულის მამასა და ბრალდებულის ადვოკატს შორის.
შეგახსენებთ, რომ 20 წლის ანა ნაცვლიშვილის ცხედარი პოლიციამ 22 თებერვალს თბილისში, თემქის დასახლებაში იპოვა. მომხდართან დაკავშირებით, სამართალდამცავებმა ლადო გრიგალაშვილი დააკავეს.
გრიგალაშვილს სახელმწიფო ბრალდებამ ბრალი სისხლის სამართლის კოდექსის 109-ე მე-3 ნაწილის „ბ“ ქვეპუნქტით დაუმძიმა, რაც განსაკუთრებული სისასტიკით განზრახ მკვლელობის ჩადენას გულისხმობს.
ბრალის დამტკიცების შემთხვევაში, გრიგალაშვილს 16-დან 20 წლამდე, ან უვადო პატიმრობა ემუქრება.
მოკლულ გოგონას 33 ჭრილობა აქვს მიყენებული, მათ შორის, თავის არეშიც.
