ჩვენი მიზანია, მთავარი პროკურორის კანდიდატურა შერჩეული იყოს საზოგადოების მაქსიმალური ლეგიტიმაციით - გიორგი კვირიკაშვილი
როგორც მან აღნიშნა. პოლიტსაბჭოს დღევანდელ სხდომაზე კონკრეტულ კანდიდატზე საუბარი არ ყოფილა და ამ საკითხზე მუშაობას იუსტიციის სამინისტრო ხვალიდან დაიწყებს.
"ხვალიდან იუსტიციის სამინისტრო დაიწყებს საზოგადოების მაქსიმალური ჩართულობით მომავალი მთავარი პროკურორის კანდიდატურაზე მსჯელობას. ეს კონსულტაციები იქნება მაქსიმალურად ფართო. ჩვენი მიზანია, რომ მთავარი პროკურორის კანდიდატურა, რომელიც იქნება შერჩეული, იყოს მაქსიმალური ლეგიტიმაციით საზოგადოების მხრიდან. კონკრეტულად კანდიდატებზე პოლიტსაბჭოზე მსჯელობა არ ყოფილა," - აღნიშნა გიორგი კვირიკაშვილმა. ის „ხორავას ქუჩის“ საქმის გამოსაძიებლად შსს-თვის გადაცემის ფაქტსაც შეეხო და აღნიშნა, რომ უწყება უშუალოდ საზოგადოებაში არსებულ კითხვებზე მუშაობს. "ორი დღის წინ შს მინისტრთან და მთავრობის ადმინისტრაციის ხელმძღვანელთან ერთად შევხვდი სახალხო დამცველ ნინო ლომჯარიას, რომელმაც მოგვაწოდა ის კითხვები, რომელიც კონკრეტულად სარალიძის და დადუნაშვილის მკვლელობის საკითხთან დაკავშირებით არსებობს. შსს-მ უკვე დაიწყო დაკითხვების პროცედურები, კონკრეტულად დანაშაულის შეუტყობინებლობის და მოწმეებზე ზეწოლის მიმართულებით. ასე რომ, ეს პროცესიც მიმდინარეობს," - განაცხადა გიორგი კვირიკაშვილმა.
