ფრაქცია „ქართული ოცნება - ძლიერი საქართველოსთვის“ ითხოვს, რომ ნინო ჟვანიას ქუჩაზე და მიმდებარე ტერიტორიაზე მშენებლობის ნებართვების გაცემა შეჩერდეს, ხოლო მიმდინარე მშენებლობებზე მორატორიუმი გამოცხადდეს.
ამის შესახებ განცხადება დღეს საგანგებოდ გამართულ პრესკონფერენციაზე ფრაქციის თავმჯდომარემ, ბიძინა გეგიძემ, გააკეთა და აღნიშნა, რომ შესაბამისი რეკომენდაციებით ფრაქციამ თბილისის მერიას უკვე მიმართა.
გეგიძის თქმით, ბოლო ორი თვეა, ფრაქცია აქტიურად სწავლობს თბილისში, მდინარე ვარაზის ხევის ლანდშაფტში, კერძოდ, ნინო ჟვანიას ქუჩასა და მის მიმდებარედ მასიური მშენებლობებისა და ქაოტური განაშენიანების საკითხს.
საკითხის პრობლემურობიდან გამომდინარე, ამ თემასთან დაკავშირებით, ფრაქციამ გამართა რამდენიმე შეხვედრა გაფართოებული ფორმატით, რომელსაც გარემოს ეროვნული სააგენტოს, დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის, საგანგებო სიტუაციების მართვის სამსახურის, თბილისის მუნიციპალიტეტის ზედამხედველობისა და არქიტექტურის საქალაქო სამსახურებისა და თბილსერვის ჯგუფის წარმომადგენლები, ასევე, კანადის სამშენებლო ნორმების კომისიისა და აშშ-ის ლორენს ლივერმოლის ნაციონალური ლაბორატორიის წარმომადგენლები ესწრებოდნენ.
საკითხთან მიმართებით ჩატარებულია 3 თემატური კვლევა: გარემოს ეროვნული სააგენტოსა და სეისმური მონიტორინგის ეროვნული ცენტრის მიერ და თითოეულ კვლევაში მეცნიერულად დასაბუთებულია, რომ მდინარე ვარაზისხევის ხეობის მარჯვენა ფერდი გეოლოგიურად წარმოადგენს არამდგრად ქედს და დაუშვებელია ნებისმიერი სახით მშენებლობის გაგრძელება.
„მდინარე ვარაზისხევის ხეობის ზედა ნაწილის რთული გეომორფოლოგიური და გეოლოგიური პირობებიდან გამომდინარე, აუცილებელია კომპლექსური ღონისძიებების განხორციელება შესაბამისი სამსახურების მხრიდან. დაუყოვნებლივ უნდა შეჩერდეს მშენებლობის ნებართვების გაცემა, მიმდინარე მშენებლობებზე კი გამოცხადდეს მორატორიუმი და მშენებლობის პროცესი განხორციელდეს მხოლოდ ტერიტორიის კომპლექსური შეფასების შემდეგ, რადგან ხელისუფლების უპირველესი მიზანი და ვალდებულება თანამოქალაქეების სიცოცხლისა და უსაფრთხოების დაცვაა. არანაირი ინტერესი არ არსებობს, რომ კერძო მესაკუთრის ინტერესი დაზარალდეს, მაგრამ ეს არ უნდა მოხდეს მოქალაქეების უსაფრთხოების ხარჯზე,“ - განაცხადა გეგიძემ.
