პრეზიდენტ გიორგი მარგველაშვილის მიერ შეწყალებულ მსჯავრდებულის, ნიკოლოზ თავაძის საქმის განხილვა თბილისის სააპელაციო სასამართლოში დღეს რამდენიმე საათის განმავლობაში მიმდინარეობდა. მან სასამართლოს შენობა კომენტარის გარეშე დატოვა.
დღევანდელ პროცესზე ბრალდებისა და დაცვის მხარეებმა დასკვნითი სიტყვა წარმოთქვეს. ორივე მხარე მუხლის გადაკვალიფიცირებას ითხოვს. თუმცა, რა სახის გადაწყვეტილებაც არ უნდა მიიღოს მოსამართლემ, თავაძე საპატიმროს გარეთ დარჩება, რადგან ის პრეზიდენტმა უკვე შეიწყალა.
ცნობისთვის, დანაშაული 2 წლის წინ, ყაზბეგის გამზირზე მოხდა. გამოძიების ვერსიით, ნიკოლოზ თავაძეს და გიორგი უგრეხელიძეს შორის კონფლიქტი მოხდა, რა დროსაც თავაძემ უგრეხელიძე დაჭრა. გამოძიება განზრახ მკვლელობის მცდელობისთვის დაიწყო, თუმცა, საქალაქო სასამართლოში მუხლი გადაკვალიფიცირდა და თავაძე მოსამართლემ ჯანმრთელობის განზრახ მძიმე დაზიანებისთვის გაასამართლა. მას სამ წლიანი პატიმრობა მიუსაჯეს. თუმცა, 1 წლისა და 6 თვის შემდეგ პატიმრობიდან პრეზიდენტის შეწყალების საფუძველზე გათავისუფლდა.
შვილის შეწყალებისთვის პრეზიდენტს დედამ მიმართა. შედეგად ნიკოლოზ თავაძე პატიმრობიდან გასული წლის ოქტომბერში გათავისუფლდა. ეს პირველი პრეცედენტია, როცა პრეზიდენტმა შეიწყალა მსჯავრდებული, რომლის საქმის განხილვა ზედა ინსტანციებში საბოლოოდ არ დასრულებულა.
მორიგი სხდომა სააპელაციო სასამართლოში 23 მაისს, მხარეთა რეპლიკით განახლდება.
