იური ლევადას ანალიტიკურმა ცენტრმა რუსეთის მიერ ოკუპირებული საქართველოს რეგიონების ირგვლივ რუსეთის მოსახლეობს სოციოლოგიური გამოკითხვა ჩაატარა.
ცენტრის ინფორმაციით, რუსეთის 45 რეგიონის 130 რაიონში, გამოკითხულია 1600 რუსეთის მოქალაქე 18 წლის ასაკიდან. ცენტრი ასევე აღნიშნავს, რომ სტატისტიკური ცდომილება ამ გამოკითხვის შედეგებისა 3,4% არ აღემატება.
როგორც სოციოლოგიური გამოკითხვის შედეგად გაირკვა ზოგადად ე.წ. სამხრეთ ოსეთში არსებული სიტუაცია გამოკითხულთა თითქმის ნახევარს 49 % აინტერესებს. ცხინვალის რეგიონში არსებული სიტუაციით მაღალ დაინტერესებას კი მხოლოდ 9 % ამჟღავნებს.
რუსების უმეტესობისათვის კავკასიაში წარმოქმნილი კონფლიქტის მიზეზად გარეშე ძალები რჩება. მათი აზრით - ეს არის აშშ-ს სწრაფვა კავკასიაში თავისი გავლენის გამყარებისათვის და საქართველოს დახმარებით რუსეთის ჩათრევა კონფლიქტში.
"სულ უფრო და უფრო მეტი რესპოდენტი გამოთქვამს აზრს იმის შესახებ, რომ 2008 წლის აგვისტოში რუსეთმა გააკეთა ყველაფერი რაც მასზე იყო დამოკიდებული იმისათვის, რომ კონფლიქტის ესკალაცია არ დაეშვა. თუ 2009 წელს ჩატარებული გამოკითხვით ამ აზრს გამოკითხულთა 57 % გამოთქვამდა, დღეს უკვე ამ აზრს 64 % გამოთქვამს.
ამასთან ერთად შემცირდა იმ ადამიანთა რიცხვი რომლებიც მიიჩნევენ, რომ კრემლი წამოეგო საქართველოს ხელისუფლების პროვოკაციას და ამით საკუთარ თავს საერთაშორისო დონეზე პრობლემა შეუქმნა - თუკი 2009 წელს ამ აზრს 21 % გამოთქვამდა დღეს ამ აზრს მხოლოდ 15 % გამოთქვამს", _ იუწყება ცენტრი.
მათივე ინფორმაციით, გამოკითხულთა უმეტესობა (56 %) იზიარებს რუსეთის მთავრობის იდეოლოგიურ ხაზს ამ კონფლიქტში ქართული მხარის დასავლეთის ქვეყნების მხარდაჭერასთან დაკავშირებით.
ამას გარდა, გამოკითხულთა შორის არის გაურკვევლობა იმისა თუ როგორ შეიძლება განვითარდეს მოვლენები მომავალში კავკასიაში. გამოკითხულთა 39 % მიიჩნევს, რომ უახლოეს მომავალში არის ალბათობა იმისა, რომ საქართველოსა და რუსეთს შორის სამხედრო კონფლიქტი განმეორდეს. 36 % მიიჩნევს, რომ ეს ნაკლებსავარაუდოა ან შეუძლებელი. 24 % კი პასუხი არ აქვს.
ამასთან ერთად, გამოკითხულთა უმრავლესობა მიიჩნევს, რომ აფხაზეთისა და სამხრეთ ოსეთის დამოუკიდებლობის აღიარებას რუსეთისათვის არავითარი სარგებელი არ მოუტანია. გამოკითხულთა 60 % მიიჩნევს, რომ "ამ ზომამ რუსეთს არც სარგებელი მოუტანა და არც ავნო". 14 % დარწმუნებულია, რომ ამით რუსეთმა "თავის თავს ავნო", ხოლო 25 % მიიჩნევს, რომ "აფხაზეთისა და სამხრეთ ოსეთის დამოუკიდებლობის აღიარება რუსეთს სასიკეთოდ წაადგა".
ამასთან ერთად, საინტერესოა, რომ გამოკითხულთა შორის არის შიშის გრძნობა იმ ფაქტთან დაკავშირებით, რომ შესაძლოა აფხაზეთი და სამხრეთ ოსეთი რუსეთის შემადგენლობაში შევიდეს. დომინირებს ასევე აზრი იმის შესახებ, რომ ამაზე რუსეთმა საერთოდ თავი უნდა შეიკავოს ან ეს პერსპექტივა ძალიან შორეული მომავლისათვის გადადოს. მხოლოდ 15 % მიიჩნევს რომ აფხაზეთი და სამხრეთ ოსეთი რუსეთს უნდა შეუერთდეს.
