თბილისის საქალაქო სასამართლოში ხორავას ქუჩაზე მოზარდებს შორის მომხდარი მკვლელობის საქმეზე, ყოფილი პროკურორის მირზა სუბელიანის არასრულწლოვანი შვილის დაკითხვა მიმდინარეობს. პროცესს თავად სუბელიანიც ესწრება, რადგან დასაკითხი მოწმე არასრულწლოვანია.
როგორც „ჯი-ეიჩ-ენს“ ერთ-ერთი ბრალდებულის ადვოკარტმა ტარიელ კაკაბაძემ განუცხადა, ყოფილი მაღალჩინოსანის შვილმა გამოძიებაში მიცემული ჩვენება სასამართლოში შეცვალა.
„ბრალდების მხარემ პირდაპირი დაკითხვა დაასრულა. დაცვის მხარე, ჯვარედინ დაკითხვას ვიწყებთ. მოწმემ ისაუბრა თუ როგორ დაიწყო კონფლიქტი, რომელშიც თვითონ მონაწილეობდა. ასევე, თუ როგორ ჩარია ამ კონფლიქტში სხვა პირები. როგორ გადაიზარდა კონფლიქტი ჩხუბში და შემდეგ ისაუბრა თუ როგორ დასრულდა ეს ყველაფერი“ - განაცხადა ტარიელ კაკაბაძემ.
კითხვაზე, თუ რატომ იკითხება მოწმის სახით აღნიშნული მოწმე, რომელიც კონფლიქტში მონაწილეობდა, ადვოკატი პასუხობს, რომ ამასთან დაკავშირებით კითხვები დაცვის მხარესაც აქვს.
„ზოგადად უამრავი შეკითხვა არსებობს ჩხუბში მონაწილე პირებთან დაკავშირებით თუ რატომ არიან ისინი მხოლოდ მოწმის სტატუსით. მიმაჩნია რომ ამ შეკითხვებს ბრალდების მხარემ უნდა უპასუხოს. თუმცა, ბრალდების მხარე ამ კითხვებზე ვერ პასუხობს. დღევანდელმა მოწმემ, ისევე როგორც წინა მოწმემ, აბსოლუტურად შეცვალა გამოძიებაში მიცემული ჩვენება. მან არათუ მნიშვნელოვანი დეტალები შეცვალა, არამედ მიაწოდა დანაშაულის მამხილებელი ისეთი ინფორმაცია, რომელიც მას აქამდე არ ჰქონდა ნათქვამი. ეს ინფორმაციოა ჩემი დაცვის ქვეშ მყოფის საწინააღმდეგო არ არის, მაგრამ მოწმეებს ეტყობათ რომ დარიგებულები არიან და ცდილობენ, რასაც ბრალდება ეტყვით იგივე გაიმეორონ. თუმცა, საინტერესო ის არის რომ რაც უფრო არარეალურ ფაქტებს აჟღერებენ, მით უფრო მეტ წინააღმდეგობაში აღმოჩნდებიან საკუთარ თავთან და ერთმანეთის ჩვენებებთან“ - განაცხადა „ჯი-ეიჩ-ენთან“ ტარიელ კაკაბაძემ.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
