გადაწყვეტილება, რომელიც საკონსტიტუციო სასამართლომ უნდა გამოიტანოს, ხელისუფლების დაკვეთის სახით, უკვე მიღებულია. სასამართლო სხდომები კი, ის პროცედურული საკითხია, რომელიც უნდა ჩატარდეს, – ამის შესახებ საპარლამენტო ფრაქცია „საქართველოსთვის“ თავმჯდომარემ, შალვა კერესელიძემ განაცხადა.
„ყველანაირი არგუმენტით გაუგებარია, ამ სარჩელში რატომ მოხდა დამატება. სასამართლოს სხდომაზე კითხვებს ვსვამთ და მოსამართლეს ვეკითხებით, რაში მიგვიძღვის ბრალი – ვერც გვეუბნებიან, მათ შორის ვერც „ოცნების“ წარმომადგენლები, ამბობენ, მერე გეტყვითო. ამიტომ ვთხოვდით, რომ სარჩელის განხილვა ინდივიდუალურად მომხდარიყო. უნდა ყოფილიყო ნათელი, ცხადი და გასაგები, რაში გვედავება ხელისუფლება“, – აღნიშნა კერესელიძემ.
მისივე თქმით, 12 მანდატი, რომელიც პარტიას აქვს და წარმოდგენილია საქართველოს პარლამენტში, არც ერთი მანდატი არ არის მაჟორიტარული.
„ეს არის პროპორციული მანდატი, რომელიც უშუალოდ პარტიამ მიიღო და მას ეკუთვნის. ჩვენს პარტიას თუ აკრძალავენ და მას პოლიტიკურ საქმიანობას აუკრძალავენ, მაშინ ვფიქრობ, რომ საქართველოს პარლამენტში ამ პარტიის მიერ მიღებულ მანდატებს არანაირი ძალა და არანაირი ფასი არ ექნება. არ ექნება, რადგან ეს მანდატები ეკუთვნის პარტიას და იმ შემთხვევაში, თუ ჩვენს პარტიას პოლიტიკურ საქმიანობას აუკრძალავენ, ბუნებრივია, ჩვენ პარლამენტშიც არანაირი საქმე აღარ გვექნება, ამ მანდატებს არანაირი ფასი და ძალა არ ექნება. ბუნებრივია, დავტოვებთ პარლამენტს. ჩვენ არანაირი გადაცდომა, არანაირი ანტისახელმწიფოებრივი ქმედებები, დარღვევები არ გვქონია. შესაბამისად, ეს არის ხელოვნურად მიღებული გადაწყვეტილება. ეს არის მხოლოდ პირადი შურისძიება“, – აღნიშნა შალვა კერესელიძემ.
