„ვესაუბრე, ისევ იმავეს აცხადებს, რომ მას ეს არ ჩაუდენია. თვითონაც გაოგნებულია ამ ფაქტით, არანაირი ვერსია არ აქვს თუ ვის, როგორ შეიძლებოდა ეს მკვლელობა ჩაედინა. ეს რომ იცოდეს, ვინ ჩაიდინა, გამოძიებასთან ითანამშრომლებდა და დაასახელებდა კიდეც“, - განუცხადა „ჯი-ეიჩ-ენს“ შეყვარებულის მკვლელობაში ბრალდებულის, ლადო გრიგალაშვილის ადვოკატმა, ნაირა ოტიაშვილმა.
ის მისი დაცვის ქვეშ მყოფს რამდენიმე დღის წინ შეხვდა და როგორც ადვოკატი განმარტავს, საქმის გარშემო ახალი გარემოება არ გამოკვეთილა.
„გამოძიებამ უნდა შეამოწმოს ყველაფერი, ამ ეტაპზე გამოძიებასაც არაფერი აქვს ხელმოსაჭიდი. ექსპერტიზა დანიშნულია, მაგრამ ჯერ არ ჩატარებულა, შესაბამისად, ამ ეტაპზე არაფერი სიახლე არ არის“, - აცხადებს ოტიაშვილი.
შეგახსენებთ, რომ 22 თებერვალს, თემქის დასახლებაში 20 წლის ანა ნაცვლიშვილი სასტიკად მოკლეს. აღნიშნული მკვლელობის ბრალდებით სამართალდამცავებმა ნაცვლიშვილის შეყვარებული, 20 წლის ლადო გრიგალაშვილი დააკავეს. საქმის ძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს.
გამოძიების ინფრომაციით, მკვლელობა შურისძიების ნიადაგზე მოხდა. დაკავებული ბრალს არ აღიარებს და დუმილის უფლებას იყენებს. თბილისის საქალაქო სასამართლომ ბრალდებულს აღკვეთის ღონისძიების სახით წინასწარი პატიმრობა შეუფარდა.
