ჩვენგან გამორიცხულია რაიმე პოლიტიკურ პროცესებში ჩართვა, მით უმუტეს იმ ფორმით, რაც, თითქოს, მოხდა ვანის მომსახურების ცენტრში ჩვენი წარმომადგენლის მიერ, - ასე გამოეხმაურა "ენერგო-პრო ჯორჯიას" დირექტორი მიხეილ ბოცვაძე „ევროპული საქართველოს“ ლიდერის, გიგი უგულავას
ბრალდებას იმის შესახებ რომ ვანის მუნიციპალიტეტის „ენერგო-პროს“ უბნის მენეჯერი მამა-შვილ ბელთაძეებს უკანონოდ დაემუქრა.
„ჩვენგან გამორიცხულია რაიმე პოლიტიკურ პროცესებში ჩართვა, მით უმუტეს იმ ფორმით, რაც, თითქოს, მოხდა ვანის მომსახურების ცენტრში ჩვენი წარმომადგენლის მიერ. ჩვენთან მუდმივად მიმდინარეობს მსგავსი გადამოწმებები, როგორიც იყო ერთ-ერთი ეს ობიექტი. მხოლოდ ვანში ბოლო ორ თვეში გადამოწმებულია 57 კომერციული აბონენტი, მათ შორის, ოთხ შემთხვევაში ხარვეზი დაფიქსირდა, 4-დან სამმა რეაგირება მოახდინა, ხოლო მეოთხე არის ეს ავტოსამრეცხაო, რომლის გამო, თითქოს, ასეთ სკანდალში ეხვევა კომპანია. კარგი იყო, დავლოდებოდით ჩვენს ინფორმაციას, კარგი იყო, გადამოწმებულიყო, თუმცა ნაცვლად ამისა, გუშინ საღამოს ჩვენმა წარმომადგენელმა მიიღო ზარი პოლიტიკური ლიდერისგან და დაიმსახურა მხოლოდ დედის გინება", - განაცხადა მიხეილ ბოცვაძემ.
ცნობისთვის, "ევროპული საქართველოს" ხონისა და ვანის მაჟორიტარი დპუტატობის კანდიდატის გიგი უგულავას განცხადებით, „ენერგოპროს“ ვანის რაიონის უბნის მენეჯერი და "ქართული ოცნების" საკრებულოს დეპუტატი შალვა ლორთქიფანიძე ბელთაძეების ოჯახს მასთან ფოტოს გადაღების გამო ემუქრება.
როგორც უგულავამ ბრიფინგზე აღნიშნა, ლორთქიფანიძე ბელთაძეებს "ენერგო პრო ჯორჯიას" მრიცხველთან დაკავშირებული დარღვევის მიზეზით 300-ლარიანი ჯარიმით დაემუქრა.