,,აღმაშფოთებელია ის ფაქტი, რომ ჩინოვნიკების ხელფასების გაზრდა უკვე სპეცრაზმელების დახმარებით მიმდინარეობს”, - განაცხადა „საერთაშორისო გამჭვირვალობა საქართველოს“ აღმასრულებელმა დირექტორმა ეკა გიგაურმა ბორჯომის მუნიციპალიტეტის საკრებულოში განვითარებულ მოვლენებზე.
,,ნამდვილად ვერ წარმოვიდგენდი, რომ ეს შეიძლება ჩვენს ქვეყანაში მომხდარიყო, სადაც საზოგადოებაში ძალიან დიდი აღშფოთების საგანია ის, რომ იზრდება შტატები, სახელმწიფო მოხელეების რაოდენობა, ეზრდებათ ხელფასები, მაგრამ მათი მუშაობის ხარისხი არ გაზრდილა. „ქართულმა ოცნებამ“ უნდა იცოდეს, რომ როდესაც საკრებულოში უმრავლესობით ოპოზიციაა წარმოდგენილი, ის უმრავლესობით იღებს გადაწყვეტილებას და ამ შემთხვევაში იმ რესურსის გამოყენება, რომელიც ხელისუფლებას შეუძლია სპეცრაზმის სახით, არ შეიძლება. თავდაყირა აყენებენ კოლეგიალური ორგანოს მუშაობის პრინციპებს, რაც ძალიან პრობლემატურია“, - უთხრა „რეგინფოს“ გიგაურმა.
მისივე თქმით, სიტუაცია რაც შეიძლება სწრაფად უნდა განიმუხტოს და სპეცრაზმი ახლავე უნდა გაიყვანონ ბორჯომიდან.
ბორჯომის საკრებულო ერთადერთია საქართველოში, სადაც უმრავლესობა ოპოზიციას აქვს. საკრებულოს უმრავლესობას მერიის და „ქართული ოცნების“ წარმომადგენლები იმის გამო დაუპირისპირდნენ, რომ უმრავლესობამ მხარი არ დაუჭირა მუნიციპალიტეტის მერისთვის ხელფასის 900 ლარით, ხოლო მერიის სამსახურების უფროსებისთვის 450 ლარით გაზრდას. „ქართული ოცნების“ აქტივისტები და მერიის მოსამსახურეები საკრებულოს თავმჯდომარის თანამდებობიდან ზაზა ჩაჩანიძის გადადგომას ითხოვენ. 28 თებერვალს საკრებულოს წევრებს შორის ფიზიკური დაპირისპირებაც მოხდა.
