„ზაზა ბაქრაძემ თავიდან ბოლომდე ამოაყირავა ყველაფერი“, - განუცხადა „ჯი-ეიჩ-ენს“ ბუტა რობაქიძის მამამ, სოსო რობაქიძემ. როგორც ის აღნიშნავს, კრიმინალური პოლიციის ყოფილი უფროსის, პოლკოვნიკ ზაზა ბაქრაძის აღიარება მისთვის მოულოდნელი არ ყოფილა.
„ამდენი წლის შემდეგ, ბაქრაძე ადგა და სიმართლე თქვა. ამის შანსი დონაძესაც და მიქაძესაც ჰქონდათ. ბრალს არ აღაიარებენ, მაგრამ 85 კაცი ადებს მათ ხელს, რომ შემთხვევის ადგილზე იარაღები მიიტანეს. თურმე, ამდენი ადამიანი არის მატყუარა და სამი ადამიანია მართალი. კითხვა მაქვს, ის იარაღები შურდულით შეაგდეს? იმას ვერ მეუბნებიან, ის დადებული იარაღი სად არის. გამოდის, რომ ჩემს შვილს იარაღი მე მივუტანე და მე დავუდე. რომელიმეს ეჭვი გეპარებათ, რომ მიქაძეს და დონაძეს გაყალბებაში მონაწილეობა აქვთ მიღებული და ზემდგომი ორგანოების გარეშეც რომ ვერაფერს გააკეთებდნენ?“, - აცხადებს რობაქიძე.
მისი განმარტებით, იარაღის ჩადებაზე არამხოლოდ ბარქაძე, სხვა პირებიც საუბრობენ.
„კაცმა, რომელიც კრიმინალური პოლიციის უფროსი, პოლკოვნიკი იყო, ამათ ხელი დაადო და თქვა, ხელყუმბარა ჩემი ხელით ჩავდეო. ბაქარაძის მხრიდან ამის თქმა, ჩემთვის სიურპრიზი ნამდვილად არ არის. სანდრო გირგვლიანის საქმეზე მელნიკოვმა ბოლოს გააკეთა განცხადება და სიმართლე თქვა, ისე გააკეთა ახლა ბაქრაძემაც. სხვათა შორის, მიქაძეს ვაკიდან იარაღი წამოღებული რომ აქვს, მხოლოდ ბაქრაძეს არ უთქვამს. ვაკის პოლიციის მაიორმა, გია სარიშვილმა რამდენიმე წლის წინ თქვა, მიქაძე ვაკის პოლიციაში მოვიდა, იარაღები მანქანაში ჩააწყო და დიდუბის პანთეონთან მიიტანაო.
სანდრო გირგვლიანის, სამგორის ბიჭების, ჟვანიას საქმე გაიხსენეთ, როდის უთქვამს დონაძეს დამნაშავე ვარო? 2006 წელს, გურამ დონაძემ ინტერვიუში თქვა, იმ პერიოდში საქართველოში საერთოდ არ ვიყავიო, დღეს კი აღიარებს რომ იყო. დონაძის და მიქაძის საუბარს ყურადღებას აღარ ვაქცევ. შეხედეთ, დონაძეს, ციხის სუნი ეცა, ეგონა რომ არ დაიჭერდნენ, ახლა ერთი ამბავი აქვთ დატეხილი. “, - აცხადებს სოსო რობაქიძე.
მას არ სჯერა, რომ პატრულ-ინსპექტორს, გიორგი ბაშალეიშვილს იარაღიდან ტყვია შემთხვევით არ გაუვარდა, რასაც ბუტას სიცოცხლე შეეწირა.
„დღესაც ამბობენ, ბაშალეიშვილს იარაღი გაუვარდაო. არაფერიც არ გავარდნია, მისი იარაღიდან 2 მასრაა ამოღებული. 2 გასროლა გავარდნა არაა, ამას დავამტკიცებ! შესაძლოა, ბაშალეიშვილის გასამართლებაც თავიდან მოხდეს“, - აღნიშნავს რობაქიძე.
მისთვის შსს-ს ყოფილი მინისტრის, ირაკლი ოქრუაშვილის ჩვენება არადამაჯერებელია და აცხადებს, რომ აღნიშნულ დანაშაულში არამხოლოდ ბრალდებული პირები, არამედ მთელი მაშინდელი მთავრობა იყო ჩართული.
„მთელი მთავრობა იყო ამ საქმეში ჩართული. ახლა ოქრუაშვილი რაღაცას ბოდიალობს. ვაჟკაცობაზე რომ ლაპარაკობს, მიშამ 2 დღით რომ დაიჭირა, ჩასვრილი ოქრუაშვილი მახსოვს! რის ვაჟკაცობაზე საუბრობს? ყველაფერი გეგმაში მაქვს, ყველაფერი თავის დროზე მოხდება, ვინ იცოცხლებს, ვინ მოკვდება. ოქრუაშვილიც დაჯდება ციხეში, ამის პირობას გაძლევთ. სოსო რობაქიძემ, ირინა ენუქიძემ, ზურა ვაზაგაშვილმა მთელი 5 წელი იბრძოლეს, რომ ოქრუაშვილს ქართული მიწა ენახა, თვითონ კიდევ კურდღელივით გაიქცა საფრანგეთში, ჩემს ცოლ-შვილს არაფერი დაემართოსო და სხვის ცოლ-შვილს ანადგურებდა, ის არის გარეწარი კაცი!“, - აცხადებს რობაქიძე.
შეგახსენებთ, რომ გუშინ, თბილისის საერთაშორისო აეროპორტში წითელი ცირკულარით ძებნაში მყოფი კრიმინალური პოლიციის ყოფილი უფროსი, ზაზა ბაქრაძე დააკავეს. მან აღიარა, რომ ბუტა რობაქიძის მკვლელობის ადგილის გაყალბებაში მონაწილეობა მიიღო.
გამოძიების ინფორმაციით, ბაქრაძემ 2004 წლის 24 ნოემბერს თბილისში, წერეთლის გამზირზე მომხდარი შემთხვევის დროს, სხვა პირებთან ერთად, დანაშაულის დაფარვის მიზნით, მართლსაწინააღმდეგოდ შეძენილი ცეცხლსასროლი იარაღი და საბრძოლო მასალა შემთხვევის ადგილზე მიიტანა. ჩადენილი დანაშაულის გამო, 2013 წლის 7 თებერვალს ბრალი დაუსწრებლად წარედგინა.
დაკავებულს ბრალად ედება საქართველოს სისხლის სამართლის კოდექსის 236-ე მუხლის მე-3 და 332-ე მუხლის მე-3 ნაწილით გათვალისწინებული დანაშაულები, რაც გულისხმობს ცეცხლსასროლი იარაღის მართლსაწინააღმდეგო გადაზიდვას და სამსახურებრივი უფლებამოსილების ბოროტად გამოყენებას.
ბუტა რობაქიძის მკვლელობის საქმეზე სამსახურებრივი უფლებამოსილების ბოროტად გამოყენებას შსს-ს ყოფილ მაღალჩინოსნებს ედავებიან. აღნიშნულზე ბრალდებულია 5 პირი: გურამ დონაძე, ირაკლი ფირცხალავა, ზაზა ბაქრაძე, დავით იაშვილი და ზურა მიქაძე. ბაქრაძის გარდა, აღნიშნული პრებიდან ყველა მათგანი თავისუფლებაში გირაოს სანაცვლოდ იმყოფება.
