„დიდი ბრიტანეთის არც ერთი პრემიერ-მინისტრი არ დათანხმდებოდა ამაზე. ჩვენ ამას არასდროს გავაკეთებთ“, - განაცხადა დიდი ბრიტანეთის პრემიერ-მინისტრმა ტერეზა მეიმ პარლამენტში და პირობა დადო, რომ „ბრექსიტის“ შეთანხმების პროექტს, რომელიც გუშინ ევროკავშირმა გამოაქვეყნა, არასდროს მიიღებს.
ტერეზამეისთვის მიუღებელი აღმოჩნდა საკითხები საბაჟო შემოწმებასთან დაკავშირებით დიდი ბრიტანეთისა და ირლანდიის საზღვარზე. პროექტის მიხედვით, ჩრდილოეთ ირლანდია ევროკავშირის საბაჟო კავშირში ევროპის სასამართლოს იურისდიქციაში რჩება, მეი კი მიიჩნევს, რომ მან საბაჟო კავშირი უნდა დატოვოს.
ევროკომისიამ დიდი ბრიტანეთის ევროკავშირიდან გასვლის პირველი პროექტის ტექსტი გუშინ გამოაქვეყნა. ტექსტი ბრიუსელში ევროკომისიის პრეს-სამსახურმა გაავრცელა და ბრიფინგზე ევროკავშირის მხრიდან მთავარმა მომლაპარაკებელმა ბრექსიტის საკითხში მიშელ ბარნიემ წარადგინა.
დოკუმენტი, სათაურით „დიდი ბრიტანეთის გაერთიანებული სამეფოსა და ჩრდილოეთ ირლანდიის ევროკავშირიდან და ევროპის ატომური ენერგიის გაერთიანებიდან გასვლის შეთანხმების პროექტი“ 111 გვერდისგან შედგება და დეკემბერში ბრიუსელსა და ლონდონს შორის შეთანხმებების დასრულებული პირველი ეტაპის შედეგებს აჯამებს. მასში შედის ევროკავშირის მოქალაქეების უფლებების გარანტიები დიდ ბრიტანეთში და პირიქით, ირლანდიასა და ჩრდილოეთ ირლანდიას შორის საზღვრის ღიაობის სტატუსი, ლონდონის ფინანსური ვალდებულებები „ბრექსიტის“ შემდეგ.
„საუბარი ეხება შეთანხმების პროექტს. ჩვენ ამ იურიდიული ტექსტის განხილვას ევროკავშირის 27 ქვეყანასთან და ევროპარლამენტთან ამ წუთიდანვე დავიწყებთ. ყველა მოლაპარაკება შემოდგომისთვის უნდა დავასრულოთ, რათა შეთანხმების რატიფიცირება ვადაში შევძლოთ“, - განაცხადა ბარნიემ.
