„გამოძიება ობოლ და მზრუნველობა მოკლებულ ბავშვთა ფონდ „იავნანას“ კუთვნილი თანხების არამიზნობრივ ხარჯვასთან დაკავშირებით მიმდინარეობს“, - ამის შესახებ თბილისის საქალაქო სასამართლოში, პროკურორმა მაია ჯვარშეიშვილმა განაცხადა.
პროკურორის განმარტებით, გამოძიების ამ ეტაპზე, საუბარია, რამდენიმე ასეული ათასი ლარის ხარჯვის მიზნობრიობაზე.
„გამოძიების პერიოდში ამოღებულია, დოკუმენტაცია, ფონდ „იავნანას“ დაფუძნებიდან, 2017 წლის ჩათვლით, რომლის შესწავლის პერიოდშიც გამოიკვეთა არაერთი მნიშვნელოვანი და საეჭვო გარემოება, ფონდის კუთვნილი თანხების ხარჯვის მიზნობრიობასთან დაკავშირებით. აქედან გამომდინარე, გამოძიებას კითხვები აქვს ფონდის დამფუძნებელთან და მის ყოფილ პრეზიდენტთან, დღევანდელ დღეს სწორედ ამ საკითხების ირგვლივ მოხდება მისი მოწმის სახით დაკითხვა, მაგისტრ მოსამართლესთან“, - განაცხადა პროკურორმა.
კითხვაზე, გამოძიების ამ ეტაპზე არის თუ არა საფუძველი, რომ მას ბრალი წარედგინოს, პროკურორი პასუხობს, რომ ეს საგამოძიებო მოქმედებების დასრულების შემდეგ გახდება ცნობილი.
„გამოძიების ამ ეტაპზე, ბატონი პაატა მოწმის სახით იკითხება, საგამოძიებო და საპროცესო მოქმედების, შესაბამისი სამართლებრივი შედეგი მოგვიანებით გახდება ცნობილი. საქმე ეხება არაერთ, ცალკეულ საკითხს, მათ შორის, მგზავრობის დაფინანსებას, კონკრეტული ქონების შეძენის საკითხის მიზნობრიობას, ასევე მიმდინარე ხარჯებს, რასთან დაკავშირებითაც, გამოძიებას არაერთი მნიშვნელოვანი და საინტერესო კითხვა აქვს“,- განმარტა ჯვარშეიშვილმა.
შეგახსენებთ, მთავარმა პროკურატურამ, ფონდ „იავნანას“ ხელმძღვანელი პირების მიერ დიდი ოდენობით თანხების შესაძლო მითვისება-გაფლანგვის ფაქტზე გამოძიება 20 სექტემბერს დაიწყო.
ცნობისთვის, პაატა ბურჭულაძემ საგამოძიებო ორგანოში გამოკითხვაზე უარი განაცხადა. მან ჩვენების მიცემა სასამართლოში ისურვა.
