"საქართველოს ბიზნესასოციაცია" პროფესიული კავშირების გაერთიანების თავმჯდომარეს უპირისპირდება და კავშირს ინვესტორების "დაფრთხობისგან" თავის შეკავებას ურჩევს.
"თითოეული ჩვენთაგანის, მათ შორის, პროფკავშირების ძალისხმევაც მიმართული უნდა იყოს ქვეყანაში დამატებითი ინვესტიციების მოზიდვის და დამატებითი სამუშაო ადგილების შექმნის მიმართულებით და არა ინვესტორების საწინააღმდეგოდ და მათ დასაფრთხობად", _ ნათქვამია ბიზნესასოციაციის განცხადებაში.
აღნიშნული განცხადება ბზნესასოციაციამ, 21 ივლისს მედიასაშუალებეით პროფესიული კავშირების გაერთიანების თავმჯდომარის, ირაკლი პეტრიაშვილის მიერ გაკეთებული განცხადების საპასუხოდ გააკეთა. პეტრიაშვილი "პუმა აჭარის" მისამართით, კომპანიის საქმიანობასა და მის მიერ საქართველოში ახალი საწარმოების გახსნასთან დაკავშირებით პროტესტს გამოთქვამს.
საქართველოს ბიზნესასოციაციამ და საქართველოს დამსაქმებელთა ასოციაციამ პეტრიაშვილის განცხადებას განცხადებითვე უპასუხა.
"მიგვაჩნია, რომ თითოეული ჩვენთაგანის, მათ შორის, პროფკავშირების ძალისხმევაც მიმართული უნდა იყოს ქვეყანაში დამატებითი ინვესტიციების მოზიდვის და დამატებითი სამუშაო ადგილების შექმნის მიმართულებით და არა ინვესტორების საწინააღმდეგოდ და მათ დასაფრთხობად. კიდევ ერთხელ ვაცხადებთ, რომ მხარს ვუჭერთ საინვესტიციო პოლიტიკას, რომლის მთავარი მიზანია საქართველოში შეიქმნას მიმზიდველი ბიზნეს-გარემო, რამაც მოტივაცია უნდა შეუქმნას ინვესტორებს განახორციელონ ინვესტიციები საქართველოში, რაც ქვეყნის ეკონომიკის განვითარების და მოსახლეობის ეკონომიური მდგომარეობის გაუმჯობესების აუცილებელი და უმთავრესი პირობაა. კვლავ ვრჩებით იმ პრინციპის გამტარებლად, რომლის მიხედვითაც მიგვაჩნია, რომ სამეწარმეო სფეროდან წამოჭრილი ნებისმიერი საჭირბოროტო საკითხის განხილვა, უპირველესად უნდა წარმოებდეს საწარმოებთან ან მათ წარმომადგენლებთან (ასოციაციებთან) ცივილური მოლაპარაკებების ფორმატში და მაქსიმალურად შეზღუდული იქნას ბიზნესის, მით უმეტეს უცხოელი ინვესტორის მიმართ უსაფუძვლო, ნეგატიური პოზიციების საჯარო განცხადება", _ ნათქვამია ბიზნესასოციაციის მიერ გავრცელებულ განცხადებაში.