ლორას რომ ტრამპი არ ევასება, ამან საქართველო-ამერიკის ურთიერთობებს ჩრდილი არ უნდა მიაყენოს, - ასე გამოეხმაურა პარლამენტის ვიცე-სპიკერი ირმა ინაშვილი NDI-ის საქართველოს ოფისის ხელმძღვანელ ლორა თორნტონის განცხადებას, რომლის თანახმადაც ტრამპი საქართველოს რუკაზეც კი ვერ იპოვის.
“არ ვიცი, “ქართულ ოცნებას” რა პათოსი აქვს, მაგრამ NDI-ის ხელმძღვანელის განცხადება მართლაც უხერხულია. რბილად რომ ვთქვათ, არადიპლომატიური, არაკორექტულია, რადგან ამერიკის შეერთებული შტატები ჩვენი სტრატეგიული პარტნიორია და დონალდ ტრამპმა გადასარევად იცის, საქართველო სად არის. ის, რომ ლორას ტრამპი არ ევასება, ჩვენ ვიცით, მაგრამ ამან საქართველო-ამერიკის ურთიერთობებს არ უნდა მიაყენოს ჩრდილი”, – განაცხადა ინაშვილმა.
ცნობისათვის, ლორა თორნტონმა რამდენიმე დღის წინ სოციალურ ქსელში დაწერა, რომ ტრამპი რუკაზე საქართველოს დიდი ალბათობით ვერც იპოვის.
”გასულ ღამეს, "იმედის" ჟურნალისტმა სიტყვასიტყვით მკითხა, ხომ არ გეგმავდა NDI-ი აშშ-ის და რუსეთის სამხედრო ძალებზე კითხვის ფორმულირებით ამერიკის პრეზიდენტის რუსეთთან დაპირისპირების ლობირებას. ხმამაღლა გამეცინა. ტრამპი რუკაზე საქართველოს დიდი ალბათობით ვერც იპოვის, არათუ თვალს ადევნებს აქ ჩატარებული კვლევის შედეგებს! მაგრამ მე მომწონს ვარაუდი, თითქოს ამხელა გავლენა გვაქვს!”, - დაწერა ლორა თორნტონმა.
აღნიშნული განცხადების გამო, საპარლამენტო უმრავლესობის წევრი ირაკლი მეზურნიშვილი NDI-ის ხელმძღვანელისგან საჯარო ბოდიშს ითხოვს.
