მოსკოვში, პოლიციელებმა პოლიტიკოსი ალექსეი ნავალნი დააკავეს. ის ტვერის ქუჩაზე ახლახან მივიდა თავის ორგანიზებულ აქციაზე "ამომრჩევლების გაფიცვა". დაპატიმრებამდე ნავალნიმ მხარდამჭერებს მიმართა და უთხრა, რომ ,,პოლიციისგან მის გათავისუფლებას ნუ შეეცდებიან“.
აქციები რუსეთის 100-ზე მეტ ქალაქშია დაგეგმილი, თუმცა ხელისუფლებამ მოსკოვსა და პეტერბურგში მიტინგის ჩატარების სანქცია არ გასცა. გამოსვლების მთავარი ლოზუნგი 18 მარტის საპრეზიდენტო არჩევნების ბოიკოტია.
დედაქალაქში დილიდან უსაფრთხოების ზომებიც გააძლიერეს. მანამდე პოლიცია ნავალნის ოფისში შეიჭრა. პოლიციელებმა დააკავეს ნავალნის მოსკოვის ოფისის ხელმძღვანელი სერგეი ბოიკო და ასევე რამდენიმე თანამშრომელი. მათ მასობრივი აქციების ორგანიზების შესახებ კანონის დარღვევა დასდეს ბრალად. სამართალდამცველებმა უკვე დააკავეს 40-ზე მეტი აქტივისტი.
ოპოზიციონერმა პოლიტიკოსმა მხარდამჭერებს საპროტესტო გამოსვლებისკენ მას შემდეგ მოუწოდა, რაც რუსეთის ცენტრალურმა საარჩევნო კომისიამ მისი პრეზიდენტობის კანდიდატად რეგისტრაციაზე უარი თქვა.
