მწერლებისა და საზოგადოებრივი მაუწყებლის ბორდის შეხვედრა დასრულდა. მათი განცხადებით, მიიღეს დაპირება, რომ პირველი არხის მენეჯმენტის პასუხისმგებლობის საკითხზე პროცედურების დაცვით იმსჯელებენ.
"ბორდის წევრების მხრიდან ცალსახად არ დაფიქსირებულა პოზიცია, რომ ვასილ მაღლაფერიძის გადადგომის საკითხს იზიარებენ. როგორც გვითხრეს, უნდა დაველოდოთ მათ გადაწყვეტილებას და ამის მიხედვით ვიმოქმედებთ. გვაქვს ინტერესი, რომ მაუწყებლის შელახული რეპუტაცია აღდგეს და ამისათვის საჭიროა ადეკვატური რეაგირება. ბორდი როდის დაასრულებს მოკვლევას, ჯერ ზუსტი პასუხი არ უთქვამთ, თუმცა გვითხრეს, რომ ძალიან არ გაიწელება",- განაცხადა მწერალმა ზაალ ანდრონიკაშვილმა.
საზოგადოებრივი მაუწყებლის ბორდის თავმჯდომარე გრიგოლ გოგელია აცხადებს, რომ პოეტ ზვიად რატიანის შესახებ პირველ არხზე მასალის გაშვებისას სტანდარტები დარღვეული იყო. მისი თქმით, საკითხს შეისწავლიან და შესაბამისი რეაგირებაც იქნება, თუმცა მოიაზრება თუ არა არხის გენერალური დირექტორის, ვასილ მაღლაფერიძის გადაყენების საკითხი, გოგელიას არ დაუკონკრეტებია.
საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეოკადრები, რომელზეც არაფხიზელ მდგომარეობაში მყოფი ზვიად რატიანია ასახული.