22 ოქტომბრის ღამეს რუსეთის საოკუპაციო ძალებმა კიევის წინააღმდეგ, სხვა შეიარაღებასთან ერთად, კასეტური ქობინებით აღჭურვილი სამი ბალისტიკური რაკეტა გამოიყენეს. ერთ-ერთი მათგანი კიევის ისტორიულ ცენტრს მოხვდა.
ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს.
ზელენსკის განცხადებით, მან უკრაინის ქალაქებსა და დასახლებებზე რუსეთის თავდასხმების შედეგების ლიკვიდაციის შესახებ ანგარიში მოისმინა.
უკრაინის ხელისუფლების ინფორმაციით, 22 ოქტომბრის ღამეს რუსეთმა კიევის წინააღმდეგ, სხვა შეიარაღებასთან ერთად, კასეტური ქობინებით აღჭურვილი სამი ბალისტიკური რაკეტა გამოიყენა. ასეთი რაკეტები სამიზნესთან მიახლოებისას ჰაერში ფეთქდება და 400 მეტრის რადიუსში ყველაფერს აზიანებს.
ერთ-ერთი რაკეტა კიევის ისტორიულ ცენტრში - პეჩერში ჩავარდა , კერძოდ, კიევ-პეჩერის ლავრასა და წმინდა ვვედენსკის მონასტერს შორის მდებარე ტერიტორიაზე. დაზიანდა მონასტრის შენობები, საცხოვრებელი სახლები, მაღაზიები, კაფეები და ქალაქის სხვა სამოქალაქო ინფრასტრუქტურა.
„ეს კიდევ ერთი უკიდურესად საჩვენებელი დარტყმაა - საჩვენებელი იმით, რომ ის შემთხვევითი არ ყოფილა. ეს იყო იარაღის შეგნებული არჩევანი, დარტყმის ადგილის შეგნებული შერჩევა და სამოქალაქო მოსახლეობისთვის რაც შეიძლება მეტი დანაკარგისა და ზიანის მიყენების განზრახული მცდელობა. იქვე, თეორიულ დონეზეც კი, არცერთი სამხედრო ობიექტი არ ყოფილა, იარაღი კი მასშტაბური დაზიანებისთვის არის გათვლილი. რუსეთს ამ ომის წარმოების მიდგომები არ შეუცვლია და არ დგამს ნაბიჯებს, რომლებიც ომის რეალურად შეჩერების სურვილზე მიუთითებდა“, - წერს ზელენსკი.
