თბილისის საქალაქო სასამართლომ დამამძიმებელ გარემოებაში, ჯგუფურად მკვლელობის მცდელობასა და ცეცხლსასროლი იარაღის უკანონოდ შეძენა-შენახვა-ტარებაში ბრალდებული ზვიად საღინაძე გაამართლა. მოსამართლე შორენა გუნცაძემ ის დამნაშავედ ცივი იარაღის ტარების ნაწილში ცნო და ერთი წლით თავისუფლების აღკვეთა მიუსჯა.
როგორც საღინაძის ადვოკატი, ტარიელ კაკაბაძე „ჯი-ეიჩ-ენთან“ აცხადებს, მისი დაცვის ქვეშ მყოფი ამ გაუგებრობაში შემთხვევით აღმოჩნდა.
„მოსამართლემ სრულიად სამართლიანი განაჩენი გამოიტანა. დაცვის მხარემ დამაჯერებლად დავასაბუთეთ, რომ ზვიად საღინაძეს გასროლა საერთოდ არ განუხორციელებია და მას არც იარაღთან ჰქონია საერთოდ შეხება. ჩვენ დავასაბუთეთ, რომ ზვიად საღინაძე ამ გაუგებრობაში შემთხვევით მოხვდა. შესაბამისად, ეს ადამიანი ორი ან მეტი პირის მკვლელობის მცდელობის ნაწილში გამართლდა, ის ასევე გამართლდა ცელცხლსასროლი იარაღის შეძენა-შენახვა-ტარების ნაწილშიც.
მოგეხსენებათ, მკვლელობის მცდელობა მოტივის გარეშე არ არსებობს. ბრალდების მხარე აცხადებდა, რომ საღინაძეს მკვლელობის მოტივი ჰქონდა. თუმცა, დაზარალებულებმა დაკითხვისას განაცხადეს, რომ საღინაძეს არც კი იცნობდნენ და მასთან არანაირი ურთიერთობა ჰქონდათ. რა თქმა უნდა, ბრალდებულიც იგივეს აცხადებდა. არანაირი მტკიცებულება, რომელიც დაზარალებულების და ბრალდებულის კავშირზე მიუთუთებდა, საქმეში არ არსებობს“, - აცხადებს კაკაბაძე.
გამოძიების ვერსიით, 2017 წლის თებერვალში, ზვიად საღინაძე, ოთხ დაუდგენელ პირთან ერთად, შატბერაშვილის ქუჩაზე მანქანაში მსხდომ ორ პირს – ლევან ლორთქიფანიძესა და ჯემალ სირაძეს თავს დაესხა და ცეცხლი გაუხსნა. ადგილიდან 50 მასრაა ამოღებული. დაზარალებულებიდან ერთ-ერთი ინტერპოლის ეროვნული ბიუროს უფროსი ინსპექტორია, რომელმაც თავდამსხმელებს საპასუხო ცეცხლი გაუხსნა. გამოძიების ინფორმაციით, სწორედ ამ დროს დაიჭრა ზვიად საღინაძე.
ამ დრომდე დაუდგენელია ის ოთხი პირი, რომელიც გამოძიების ვერსიით, თავდასხმაში მონაწილეობდა. საქმეში მოტივი არ გამოკვეთილა.
ბრალდების მხარე სასამართლოს გადაწყვეტილებით უკმაყოფილოა და განაჩენს სააპელაციო სასამართლოში გაასაჩივრებს.
