თბილისში, გაბრიელ სალოსის გამზირზე მიმდინარე სპეცოპერაციისას დაჭრილი სპეცრაზმელი, არაოფიციალაური ინფორმაციით, გარდაიცვალა. ამის შესახებ ინფორმაციას "რუსთავი 2" ავრცელებს.
სპეცდანიშნულების რაზმის წევრს ოპერაცია ინგოროყვას კლინიკაში უტარდებოდა. არსებული ინფორმაციით ის თავის არეში იყო დაჭრილი, მას ოპერაცია თითქმის ორი საათის განმავლობაში უტარდებოდა, თუმცა ექიმებმა მისი გადარჩენა ვერ შეძლეს.
სამართალდამცველის გარდაცვალების შესახებ კომენტარს ჯერჯერობით არც ინგოროყვას კლინიკაში და არც ჯანდაცვის სამინისტროში არ ადსტურებენ.
ადგილზე რჩებიან სამართალდამცველები. მობილიზებულია კრიმინალური პოლიციაც.
ცნობისთვის, ადგილზე სროლის ხმა ისმის. ტერიტორიაზე რამდენიმე წუთის წინ სახანძრო მანქანა შევიდა. ადგილიდან დაჭრილი სპეცრაზმელი გაიყვანეს.
შეგახსენებთ, ბერი გაბრიელ სალოსის ქუჩაზე გვიან ღამიდან მოყოლებული, სპეცოპერაცია მიმდინარეობს.
ადგილზე რჩება საპატრულო პოლიციის რამდენიმე ეკიპაჟი. სამართალდამცავების ნაწილი იმ კორპუსის მეორე სართულზე იმყოფება, სადაც სპეცოპერაცია მიმდინარეობს.
არსებული ინფორმაციით, 46 კორპუსის მე-3 სართულზე შეიარაღებული პირები იმყოფებიან, სადაც მათი აყვანის ოპერაცია მიმდინარეობს.
