დიაბეტით დაავადებულ ბავშვთა ასოციაციის პრეზიდენტი კობა ამირხანაშვილი მიიჩნევს, რომ ახალი საგადასახადო კოდექსის პროექტში სახელმწიფო სამედიცინო პროგრამები დღგ-ისგან არ თავისუფლდება. მისი თქმით, ამის გამო ადამიანებს პროგრამებით სარგებლობა შეეზღუდებათ. ეს განცხადება ამირხანაშვილმა დღეს პარალმენტში საფინანსო საბიუჯეტო კომიტეტის სხდომაზე ახალი საგადასახადო კოდექსის მეორე მოსმენით განხილვისას გააკეთა.
როგორც მან აღნიშნა, იმ თავში, სადაც წარმოდგენილია ნუსხა, ვინც დღგ-ისგან თავისუფლდება, არ არის მოხსენიებული სახელმწიფო პროგრამები. ამირხანაშვილი მიიჩნევს, რომ ამით 350-მილიონიანი პროგრამებიდან 75-80 მილიონი დღგ-ის გადასახადზე წავა. მისი თქმით, მთავარი პრობლემა არის ის, რომ სამედიცინო პროგრამების დაფინანსება ისედაც მცირეა და შესაბამისად მოსახლეობას პრობლემები შეექმნება.
მის მოსაზრებას ფინანსთა მინისრის მოადგილე ირაკლი სირაძე კატეგორიულად ეწინააღმეგება და აღნიშნავს, რომ "დღგ-ისგან თავისუფლდება მთლიანად სამედიცინო მომსახურება. ჯანდაცვის სამედიცინო პროგრამებიც ამაში შედის. ეს კი იმას ნიშნავს, რომ ამ პროგრამებს დღგ-ით დაბეგვრის საფრთხე არ ემუქრება".
