აფხაზ სეპარატისტთა ლიდერი სერგეი ბაღაფში აფხაზური ეკონომიკის ზრდის ხელის შემშლელ სერიოზულ პრობლემად წარმოების სტაგნაციას ასახელებს. ეს განცხადება ბაღაფშმა დღეს ე. წ. აფხაზური პარლამენტის წინაშე სიტყვით გამოსვლისას გააკეა.
"ძირითადი მიზეზი, რომელიც ხელს უშლის ნაციონალურ ეკონომიკას, სრული ძალით განვითარებაში ჩამორჩენილი მატერიალურ ტექნიკური ბაზაა. აღნიშნული ბარიერის გადალახვა ღრმა სტრუქტურულ ცვლილებებსა და მსხვილ კაპიტალდაბანდებებს საჭიროებს", - აცახდებს ბაღაფში და დასძენს, რომ დღეისთვის ინვესტიციების მოცულობა ეკონომიკის უმრავლეს დარგში არ შეესაბამება მათ რეალურ მოთხოვნილებებს.
ბაღაფშის თქმით, სახელმწიფოს როლი ინვესტიციური პოტენციალის ფორმირებასა და რეალიზაციაში მდგომარეობს "საინვესტიციო საქმიანობის განხორციელების ხელსაყრელი შესაძლებლობებისა და პირობების უზრუნველყოფაში".
საინვესტიციო პოლიტიკა კი, ბაღაფშის თქმით, თავის მხრივ, მთლიანობაში ე. წ. სახელმწოფოს ეკონომიკური საქმიანობის წარმატების საწინდარი იქნება.
"ახალ სტანდარტებზე გადასვლა, კორპორატიული მმართველობის ხარისხის გაუმჯობესება, ინოვაციების დანერგვა, ფინანსური მოდელების ტექნოლოგიებისა და მოდერნიზაცის ცვლილებები ქვეყანაში ბიზნესის განვითარებას შეუწყობს ხელს", - განაცხადა ბაღაფშმა და დასძინა, რომ აფხაზეთის ეკონომიკის განვითარებისთვის აგრარული სექტორის განვითარებასაც უმნიშვნელოვანესი როლი ენიჭება.
"ამ დარგში არსებული სიტუაცია კარდინალურ ცვლილებებს მოითხოვს", - განაცხადა ბაღაფშმა.
