„გირჩი“ "თანასწორობის მოძრაობის" წევრთა მიმართ განხორციელებული სავარაუდო არასათანადო მოპყრობის ფაქტზე განცხადებას ავრცელებს.
„გირჩი“ მოუწოდებს ხელისუფლებას, შეეშვას ცეცხლთან თამაშს და გადადგას ქმედითი ნაბიჯები კანონიერების გამყარებისა და რიგითი ადამიანების უფლებების დასაცავად.
"გირჩი" აქვე მოითხოვს, კანონის მთელი სიმკაცრით დაისაჯონ თანასწორობის მოძრაობის წევრებზე თავდამსხმელები და ყველა ის პოლიციელი, ვინც მონაწილეობა მოიღო მათ დამცირებასა და ფიზიკურ ზეწოლაში.
"ნებისმიერი შერჩევითობა პოლიციის ქმედებებში, რომელიც გამოწვეულია პოლიციელთა პირადი დამოკიდებულებებით ადამიანების რომელიმე ჯგუფის მიმართ, ეწინააღმდეგება სამართლებრივი სახელმწიფოს საფუძვლებს.
თანასწორობის მოძრაობის წარმომადგენლების ლევან ბერიანიძისა და თორნიკე კუსიანის მონაყოლში პოლიციელების რამდენიმე უმძიმესი დანაშაული იკვეთება: პოლიციელმა არ აღკვეთა ძალადობა, რომელსაც შეესწრო - მეტიც, ხელი შეუშალა ძალადობის შესახებ შეტყობინებას; პოლიციელებმა დააკავეს მსხვერპლი და არა მოძალადეები; პოლიციელებმა შემდეგ თავად იძალადეს დაკავებულებზე. მონაყოლიდან ჩანს, რომ რეაგირების გარეშე დატოვებული ძალადობის პირველი მსხვერპლი იყო ტრანსგენდერი ქალი, თავად ბერიანიძისა და კუსიანის მიმართ კი არსებობდა ჰომოფობიური მოტივი.
წლების განმავლობაში ჩვენ ვნახეთ უამრავი მაგალითი, როდესაც რიგითი პოლიციელები ან უფრო მაღალი რანგის მოხელეები შერჩევითად უდგებოდნენ სხვადასხვა ჯგუფის წარმომადგენლებს და არაკანონიერად მოქმედებდნენ. ამ მიდგომის მსხვერპლი არაერთხელ გამხდარან სექსუალური თუ რელიგიური უმცირესობების წევრები, პოლიტიკური ოპონენტები, ქალები. საპროტესტო აქციების მიმდინარეობისას, გირჩელებს პირადად გვსმენია პოლიციელების კომენტარები, რომ, მაგალითად, ძალადობის მსხვერპლი ქალი იყო „ღირსი“.
ამ პრობლემების გადაწყვეტას სჭირდება ხელისუფლების გამოკვეთილი ნება და აქტიური მოქმედებები. თითოეულმა სახელმწიფო მოხელემ ზუსტად უნდა იცოდეს, რომ არ აქვს უფლება საკუთარი შეხედულებები დააყენოს კანონზე მაღლა - საპირისპირო შემთხვევაში, უნდა მიიღოს შესაბამისი სასჯელი.
რა ხდება რეალურად? ერთი მხრივ, უამრავი პოპულისტური თუ რუსეთთან დაახლოებული ძალა წლებია აქტიურად აღვივებს და იყენებს სხვადასხვა ფობიას, რასაც მოჰყვება საზოგადოების დახლეჩა, ზიზღისა და აგრესიის გენერირება და ეს პირდაპირ აისახება როგორც ადამიანის უფლებების მდგომარეობაზე, ისე ეკონიმიკის განვითარებასა და ქვეყნის უსაფრთხოებაზე. მეორე მხრივ, ხელისუფლება აბსოლუტურად არაფერს აკეთებს ამ მრავალწლიანი იდეოლოგიური დივერსიის წინააღმდეგ და ხშირად, პირიქით, ხელს უწყობს. უკეთეს შემთხვევაში, ხელისუფლების სტრატეგია დაიყვანება იმაზე, რომ თავადაც „მოაჯდეს“ ქსენოფობიურ ხმებს, რაც რეალურ გამოსავალს შექმნილი სიტუაციიდან მხოლოდ გვაშორებს. ამ ფონზე, რიგითი მოხელეები სულ უფრო ხშირად სჩადიან იდეოლოგიურად მოტივირებულ უკანონობას. ეს არამხოლოდ კონკრეტულ ადამიანებს აზარალებს, არამედ საფრთხეს უქმნის მთლიანად ქვეყნის განვითარების პერსპექტივას.
„გირჩი“ მოუწოდებს ხელისუფლებას, შეეშვას ცეცხლთან თამაშს და გადადგას ქმედითი ნაბიჯები კანონიერების გამყარებისა და რიგითი ადამიანების უფლებების დასაცავად.
ამავე დროს, კონკრეტულად ამ ამაზრზენ ფაქტთან მიმართებაში ჩვენ გვაქვს ერთი კონკრეტული მოთხოვნა - კანონის მთელი სიმკაცრით დაისაჯონ თანასწორობის მოძრაობის წევრებზე თავდამსხმელები და ყველა ის პოლიციელი, ვინც მონაწილეობა მოიღო მათ დამცირებასა და ფიზიკურ ზეწოლაში", - ნათქვამია განცხადებაში.
ცნობისთვის, 25 აგვისტოს, გამთენიისას, ბათუმის ბულვარში "თანასწორობის მოძრაობის" აღმასრულებელი დირექტორი ლევან ბერიანიძე და ორგანიზაციის წევრი თორნიკე კუსიანი დააკავეს.
"თანასწორობის მოძრაობის" აღმასრულებელი დირექტორი ლევან ბერიანიძე ამბობს, რომ სამართალდამცავები მისი და მისი მეგობრების მიმართ განსაკუთრებული აგრესიით გამოირჩეოდნენ, შეურაცხყოფას აყენებდნენ და ჰომოფობიური სიტყვებით მოიხსენიებდნენ.
"პიდარასტებო, ჩვენი პატრიარქის ქვეყანაში როგორ ხართ, თქვენაირი ბინძურები როგორ უნდა დავიცვათ", - ციტირებს ლევან ბერიანიძე პოლიციელების სიტყვებს, რითაც მას და მის მეგობრების მიმართავდნენ.
მათ მოსანახულებლად სახალხო დამცველის აპარატის წარმომადგენელი ციალა ქათამაძე იმყოფებოდა.
ომბუდსმენის წარმომადგენლის განცხადებით, დაკავებულებს ერთი შეხედვით დათვალიერებისას გარკვეული ტიპის დაზიანებები აღენიშნებათ.
მისივე თქმით, სახეზე დაზიანებები, ასევე სისხლჩაქცევები, ჩალურჯებები და ნაკაწრები აქვთ და აპარატი ცდილობს დაადგინოს, ჰქონდა თუ არა ადგილი პოლიციის მხრიდან პროცესუალურ დარღვევას.
დაკავებულების სხეულზე ძალადობის კვალს საია-ც ადასტურებს.
შეგახსენებთ, "თანასწორობის მოძრაობის" წევრები პოლიციას ჰომოფობიურ ნიადაგზე ცემაში ადანაშაულებენ.
შინაგან საქმეთა სამინისტროში აცხადებენ, რომ "თანასწორობის მოძრაობის" წევრები საქართველოს ადმინისტრაციულ სამართალდარღვევათა კოდექსის 166-ე და 173-ე მუხლების თანახმად დააკავეს, რაც წვრილმან ხულიგნობას და პოლიციის კანონიერი მოთხოვნისადმი დაუმორჩილებლობას გულისხმობს. მათივე ინფორმაციით, სამართალდამცველებისადმი სიტყვიერი შეურაცხყოფის მიყენებას დაკავებულები პოლიციის განყოფილებაში გადაყვანის შემდეგაც განაგრძობდნენ. მათი ინფორმაციით, ალკოტესტით შემოწმების შედეგად, ლ.ბ.-ს და თ.კ.-ს ალკოჰოლური თრობა დაუდგინდათ.
როგორც უწყებაში აღნიშნავენ, მოძრაობის წევრების ბრალდებებს გენერალური ინსპექცია სწავლობს.
