ამ [ევროპარლამენტის] რეზოლუციის შემდეგ თავმოყვარე მთავრობა გადადგებოდა, თუმცა მაშინ, როდესაც ქვეყანა ერთი ოლიგარქის სათამაშო ველად იქცა, პაიკების ჩანაცვლებაც კი აზრს კარგავს, - ამის შესახებ ,,თავისუფალი დემოკრატების“ გენერალურმა მდივანმა, თამარ კეკენაძემ აფგან მუხთარლის საქმეზე ევროპარლამენტის საგანგებო რეზოლუციაზე საუბრისას განაცხადა.
მისი თქმით, ევროპელებმა კარგად იციან, რამხელა ზიანს აყენებს ,,ქართული ოცნების’’ ხელისუფლება საქართველოს ევროპულ მომავალს და ყოველ ჯერზე აქვთ და ექნებათ მკაცრი რეაგირება.
,,მადლობა მინდა გადავუხადო ჩვენს ევროპელ მეგობრებს, რომლებსაც სულ უფრო ხშირად უწევთ ქართველი ხალხის ინტერესების დაცვა ,,ქართული ოცნების“ მთავრობის ანტისახელმწიფოებრივი ქმედებებისგან. საბედნიეროდ, მათ კარგად იციან რამხელა ზიანს აყენებს ,,ქართული ოცნების’’ ხელისუფლება საქართველოს ევროპულ მომავალს და ყოველ ჯერზე აქვთ და ექნებათ მკაცრი რეაგირება“.
მისი განმარტებით, ,,ყველამ კარგად უნდა გავაცნობიეროთ, რომ აფგან მუხთარლის საქმე არის თითოეული ჩვენგანის ღირსების საკითხი. სანამ ბიძინა ივანიშვილს ექნება განცდა, რომ შეუძლია ყველა იყიდოს, ქვეყანა მართოს როგორც მისი კერძო საწარმო და ამაზე არ იქნება მძაფრი სამოქალაქო პროტესტი, ამ ქვეყანას სახელმწიფოდ ქცევის მომავალი არ ექნება".
პარტიის გენერალური მდივანი მიმართავს საქართველოს პრემიერ-მინისტრს და მისგან ნამდვილ, უტყუარ საგამოძიებო შედეგებს ითხოვს.
,,მივმართავ პრემიერ კვირიკაშვილს: ეყოს გონიერება, აიღოს პასუხსიმგებლობა, და ერთხელ მაინც უზრუნველყოს ნამდვილი გამოძიება".
მისივე განმარტებით, მნიშვნელოვან ყურადღებას მოითხოვს საქართველოში უსაფრთხოების სამსახურების მდგომარეობა.
,,საგანგაშოა, რომ ,,ქართული ოცნება“ ახდენს ჩვენი უსაფრთხოების სამსახურების სრულ დისკრედირაციას. მაშინ, როდესაც გვაქვს პრეტენზია გავხდეთ ნატოს და ევროკავშირის წევრი, დავანახოთ ჩვენ პარტნიორებს რომ საერთაშორისო უსაფრთხიების უზრუნველყოფაში მნიშნელოვანი როლი შეუძლიათ ჩვენს სამსახურებს შეიტანონ, ამ დროს ჩნდება საფუძვლიან ეჭვი რომ უსაფრთხოების სამსახურების გამოყენება ხდება ადამიანის გატაცებისთვის. ეს ანგრევს საქართველოს, როგორც სანდო პარტნიორის იმიჯს“, - განაცხადა თამარ კეკენაძემ.
