საკონსტიტუციო კომისიამ ე.წ. სტრასბურგის მოდელის შექმნის ინიციატივა არ მიიღო. ამის შესახებ ჟურნალისტებს კომისიის სხდომის დასრულების შემდეგ კონსტიტუციონალისტმა ვახუშტი მენაბდემ განუცხადა.
“იყო ინიციატივა, რომლის მიხედვითაც საკონსტიტუციო სასამართლოს უნდა მისცემოდა რეალური კონტროლის შესაძლებლობა ანუ საერთო სასამართლოების საბოლოო გადაწყვეტილებების კონსტიტუციური კონტროლის კომპეტენცია. სამწუხაროდ, ეს საკითხი უარყოფილია და კომისიამ მიიღო გადაწყვეტილება, რომლის მიხედვითაც საკონსტიტუციო სასამართლოს ეს უფლება არ მიენიჭება”, - განაცხადა ვახუშტი მენაბდემ
შეგახსენებთ, რომ ინიციატივის ამოქმედების შემთხვევაში საკონსტიტუციო სასამართლოში დამატებით მოსამართლეთა ახალი კოლეგიის არჩევა უნდა მოხდეს. შემადგენლობა კი შესაძლოა 9 მოსამართლიდან 15-მოსამართლემდე გაიზარდოს. შესაძლებელია საკონსტიტუციო სასამართლოს მოსამართლის ასაკის 30 წლიდან 35 ან 40 წლამდე გაზრდაც.
წინადადება საკონსტიტუციო სასამართლოს მიერ საერთო სასამართლოების მიერ მიღებული გადაწყვეტილებების გადასინჯვას ითვალისწინებს.
