უკრაინასა და ბელგიას შორის მიღწეულია შეთანხმება, რომლის მიხედვითაც ბელგია უკრაინას 2026 წლის ბოლომდე F-16-ის ტიპის სამ გამანადგურებელს გადასცემს. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
„ბელგიასთან გვაქვს მნიშვნელოვანი შეთანხმება, რომლის მიხედვითაც წლის ბოლომდე F-16-ის ტიპის სამ გამანადგურებელს მივიღებთ. ამ თვითმფრინავების გადაცემის პროცესს დაჩქარებული წესით განვახორციელებთ“, - განაცხადა ზელენსკიმ.
მისი თქმით, ბელგიისა და სხვა ქვეყნებისგან, მათ შორის ესპანეთისგან, უკრაინამ უკვე მიიღო F-16-ებისთვის განკუთვნილი საბრძოლო მასალის გადაუდებელი მიწოდებებიც.
„როდესაც რუსეთი ყოველდღიურად ზრდის ესკალაციას, საჭიროა საჰაერო სამიზნეების ჩამოგდებისა და ადამიანების დაცვის შესაძლებლობების გაძლიერება. მადლობას ვუხდი ბელგიას, პრემიერ-მინისტრ ბარტ დე ვევერს და მთელ მთავრობას უკრაინის მხარდაჭერისთვის გადადგმული გადამწყვეტი ნაბიჯებისთვის, რომლებიც რუსეთის სასტიკი დარტყმების საპასუხოდ გადაიდგა“, - აღნიშნა უკრაინის პრეზიდენტმა.
2025 წლის ოქტომბერში ბელგიის მთავრობაში აცხადებდნენ, რომ ქვეყანას უკრაინისთვის F-16-ების გადაცემა მხოლოდ მას შემდეგ შეეძლებოდა, რაც ახალ F-35-ის ტიპის გამანადგურებლებს მიიღებდა.
მანამდე ბელგიის მთავრობა აცხადებდა, რომ ქვეყანა უკრაინას 2028 წლისთვის 30 F-16-ის გადაცემას გეგმავდა.
