ფრაქცია „საქართველოს პატრიოტები“ დეპუტატებს მოუწოდებენ ხელფასის ნაწილი საქველმოქმედოდ გამოყონ. ირმა ინაშვილმა დღეს გამართულ ბრიფინგზე განაცხადა, რომ ტელეკომპანია "ობიექტივის" ჟურნალისტები საქველმოქმედო ფონდს ქმნიან, სადაც შემოწირული თანხები გაჭირვებული მოსახლეობის დახმარებას მოხმარდება.
„მე ობიექტივის დირექტორი ვიყავი ჟურნალისტებმა გადავწყვიტეთ, ჩამოგვეყალიბებინა საქველმოქმედო მოძრაობა, რომლითაც უამრავ გაჭირვებულს რეალურად დავეხმარეთ“, - განაცხადა ირმა ინაშვილმა. მისი თქმით, ობიექტივის ჟურნალისტები ისევ აპირებენ საქველმოქმედო ფონდის „ობიექტივის“ დაფუძნებას, რომელიც სოციალურად დაუცველ ადამიანებს გაუწევს დახმარებას. ინაშვილის ინფორმაციით, ფონდში ფრაქცია „საქართველოს პატრიოტების“ დეპუტატები ყოველთვიურად ხელფასიდან გარკვეული ოდენობის თანხას გადარიცხავენ.
„ჩვენ მიერ გაღებული თანხა მიზანმიმართულად დაიხარჯება და მიმართული იქნება გაჭირვებული ადამიანების დასახმარებლად. ეს არ იქნება უმნიშვნელო თანხა. მე ჩემი, როგორც ვიცე-სპიკერის, ხელფასიდან 1500 ლარს ჩავრიცხავ ამ ფონდში“, - განაცხადა ირმა ინაშვილმა. მისი თქმით, ეს ქმედება არ არის პიარ-აქცია და ფრაქციის წევრებს რეალურად სურთ დაეხმარონ გაჭირვებულ ადამიანებს.
ინაშვილმა სხვა ფრაქციების დეპუტატებს მიმართა, ასევე გაიღონ თავისი ხელფასებიდან გაჭირვებულებისთვის თანხები.