პრეზიდენტმა „ზოგადი განათლების შესახებ კანონში“ განხორციელებულ ცვლილებებს ხელი მოაწერა. პრეზიდენტის საპარლამენტო მდივანმა ანა დოლიძემ ჟურნალისტებთან განაცხადა, რომ სკოლების რეფორმის სულისკვეთებას და აუცილებლობას პრეზიდენტის ადმინისტრაცია იზიარებს.
„ეს სულისკვეთება არის ის, რომ ჩვენი მოქალაქეები და ბავშვები კანონის წინაშე თანასწორი არიან და ხარისხიანი განათლება საყოველთაოდ ხელმისაწვდომი უნდა იყოს მთელი ქვეყნის ტერიტორიაზე. განათლების პოლიტიკის წახნაგები როგორ ჩამოყალიბდება, ეს განათლების სამინისტროს და პარლამენტის პრეროგატივაა. ჩვენ ამ პროცესთან დაკავშირებით აღვნიშნავთ, რომ ყურადღებას გავამახვილებთ იმაზე, რომ განათლების პოლიტიკა ექვემდებარება კონსტიტუციურ ფასეულობებს - ეს არის თანასწორობა. ყველა ბავშვს, იმის მიუხედავად, თუ სად ცხოვრობს ის, ხარისხიან განათლებაზე უნდა მიუწვდებოდეს ხელი”, - აღნიშნა დოლიძემ.
რაც შეეხება პრეზიდენტის ადმინისტრაციის მიერ, კანონპროექტში არსებულ დისკრიმინაციულ საფრთხეებთან დაკავშირებით, გამოთქმულ მოსაზრებას, ანა დოლიძემ საკითხის კომენტირებისგან თავი შეიკავა.
