აჭარის მთავრობის თავმჯდომარე ზურაბ პატარაძე უნგრეთის საგანგებო და სრულუფლებიან ელჩს საქართველოში, შანდორ საბოს შეხვდა. გაცნობითი ხასიათის შეხვედრაზე მხარეებმა საქართველოსა და უნგრეთს შორის თანამშრომლობა და ურთიერთობის გაღრმავების შესაძლებლობები განიხილეს.
მთავრობის თავმჯდომარე სტუმარს რეგიონის საინვესტიციო და ტურისტული პოტენციალის შესახებ ესაუბრა.
შეხვედრაზე აღინიშნა აჭარაში უნგრეთიდან შემოსული ტურისტების 24,2%-იანი ზრდა, რაც ბოლო წლებში ევროპულ ქვეყნებში საქართველოს, კერძოდ, აჭარა-ბათუმის ტურისტული მიმართულების პოპულარობამ განაპირობა. ტურისტთა ნაკადის ზრდას ხელი შეუწყო ასევე ბუდაპეშტიდან ქუთაისის მიმართულებით პირდაპირი რეგულარული საერთაშორისო ფრენების დანიშვნამ.
უნგრეთ-საქართველოს შორის ურთიერთთანამშრომლობა წარმატებით მიმდინარეობს სოფლის მეურნეობის დარგში. მხარეებმა უნგრეთის გამოცდილების გაზიარების და სოფლის მეურნეობის სფეროში ერთობლივი პროექტების განხორციელების შესახებ ისაუბრეს. განიხილეს ასევე ჰუმანიტარულ და კულტურულ სფეროებში სამომავლო თანამშრომლობის პერსპექტივებიც.
„ჩვენთვის მნიშვნელოვანია უნგრეთის, როგორც ევროპული ქვეყნის გამოცდილების გაზიარება. დღევანდელ შეხვედრაზე ვისაუბრეთ სოფლის მეურნეობის დარგში ერთობლივი პროექტების განხორციელებაზე. განვიხილეთ ასევე უნგრული კომპანიების ჩართულობის შესაძლებლობები სპორტული ტურიზმის განვითარების მიზნით დაგეგმილ ინფრასტრუქტურულ პროექტებში“ - აღნიშნა ზურაბ პატარაძემ.
შანდორ საბო საქართველოში სრულუფლებიანი და საგანგებო ელჩის მოვალეობას 2015 წლის იანვრიდან ასრულებს.
