26 სექტემბრის ღამეს რუსეთის თავდასხმების შედეგად უკრაინაში 14 ადამიანი დაშავდა, კიდევ ორი ადამიანი კი ზაპოროჟიეში დაიღუპა. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
მისი თქმით, რუსეთის ძალებმა საცხოვრებელ სახლებზე იერიში მიიტანეს კიევში, ზაპოროჟიეში, ასევე ოდესის, სუმისა და ხარკივის ოლქებში.
თავდასხმების შედეგად დაზიანდა კიევის ერთ-ერთი საბავშვო ბაღი, კიევის ოლქის ლიცეუმი და ხარკივის უნივერსიტეტი. ასევე დაზიანდა ენერგეტიკული ინფრასტრუქტურის ობიექტები პოლტავის, მიკოლაივისა და ვინიცის ოლქებში.
ზელენსკიმ ახალი თავდასხმების ფონზე აშშ-ის პრეზიდენტ დონალდ ტრამპს მოუწოდა, „ლინდსი გრემის აქტი“ აღასრულოს რუსეთისა და ყველას წინააღმდეგ, ვინც მის ომს ფინანსურად მხარს უჭერს.
უკრაინის პრეზიდენტმა ასევე ევროკომისიის პრეზიდენტ ურსულა ფონ დერ ლაიენსა და ევროპული საბჭოს პრეზიდენტ ანტონიო კოშტას დამატებითი ევროპული სანქციების დაწესებისკენ მოუწოდა.
„თუ რუსებმა გადაწყვიტეს დარტყმები კიდევ უფრო სასტიკი გახადონ, მსოფლიომ საპასუხო ზომები უნდა გააძლიეროს, რათა ომი კიდევ უფრო მეტად არ გავრცელდეს“, - განაცხადა ზელენსკიმ.
ზელენსკიმ ასევე მოუწოდა, რომ მოქმედი სანქციების სიებიდან რუსი ოლიგარქები არ ამოიღონ და მომავალშიც შეიზღუდოს რუსეთთან ვაჭრობა.
შეგახსენებთ, რომ 26 სექტემბრის ღამეს რუსეთის საოკუპაციო ძალებმა კიევზე დრონებით იერიში მიიტანეს, რის შედეგადაც ოთხი ადამიანი დაშავდა.
