9 დეკემბერს ღამით აჭარის მაღაალმთიან მუნიციპალიტეტებში დაფიქსირდა 4-5 გრადუსამდე ყინვა. სამივე მუნიციპალიტეტში ინტენსიურად მიმდინარეობს გზების გაწმენდა. გადაადგილება შესაძლებელია ყველა მიმართულებით, თუმცა რეკომენდებულია მაღალი გამავლობის მანქანები და მოცურების საწინააღმდეგო ჯაჭვები.
ქედის მუნიციპალიტეტში გამოიდარა. დილიდან დაიწყო გაწმენდითი სამუშაოები მახუნცეთისა და ვაიოს მიმართულებით. მოგვიანებით ტექნიკა მობილიზებული იქნება დანდალოსა და ცხმორისის ადმინისტრაციულ ერთეულებში. დაბის ქუჩების გაწმენდას ,,კომუნალსერვისის" ტექნიკა ახორციელებს, პარალელურად სხვადასხვა დაწესებულებების თანამშრომლები მწვანე ნარგავებს თოვლის საფარისაგან ათავისუფლებენ. მუნიციპალიტეტს ელექტროენერგია შეუზღუდავად მიეწოდება. სასწავლო პროცესი კონტიგენტის გამოუცხადებლობის გამო შეწყდა მერისის საბავშვო ბაღში, ხოლო გათბობის სისტემის დაზიანების გამო - დანდალოს N1 საჯარო სკოლაში. ამ დროისთვის გზა 14 მიმართულებით იწმინდება.
შუახევის მუნიციპალიტეტში ღამით უმნიშვნელოდ თოვდა. ბათუმი-ახალციხის საავტომობილო გზის შუახევის მონაკვეთზე მოყრილია ტექნიკური მარილი და ტრანსპორტი თავისუფლად გადაადგილდება. ორხიდიანი ავტოტრანსპორტი შედის ადმინისტრაციული ერთეულების ცენტრებამდე გარდა წყალსაყრისა და შუბნის ადმინისტრაციული ერთეულებისა. დღეს იწმინდება სამთო-სათხილამურო კურორტ გომარდულის გზა.
გუშინ აღდგა თოვლისა და ქარბუქის შედეგად დაზიანებული ელექტროენერგიის მიწოდება მუნიციპალიტეტის ყველა სოფელში. მხოლოდ სოფელ ბრილში ამ წუთებშიც მიმდინარეობს სამუშაოები და დღის მეორე ნახევრისთვის აღდგება ენერგომომარაგება. მუშაობს ყველა საჯარო სკოლა, გარდა ნაღვარევისა და წაბლანისა. სწავლა შეჩერებულია მხოლოდ სოფელ ნიგაზეულის და უჩამბის ბაგა-ბაღებში. მოსახლეობა უზრუნველყოფილია სათბობით, პროდუქციის მარაგით. დაბისა და ხიჭაურის დასახლების მოსახლეობას შეუფერხებლად მიეწოდება წყალი. მუშაობს საგანგებო შტაბი.
ხულოს მუნიციპალიტეტში უხვთოვლობაა. ყველა სოფელს, გარდა რაგვთისა, მიეწოდება ელექტროენერგია. აღდგენითი სამუშაოები აღნიშნულ სოფელშიც მიმდინარეობს. გზის გაწმენდითი სამუშაოები დილიდან განახლდა მუნიციპალიტეტის სხვადასხვა მიმართულებით. გზებზე მოძრაობისას რეკომენდებულია მოცურების საწინააღმდეგო ჯაჭვების გამოყენება. სასწავლო პროცესი შეუფერხებლად მიმდინარეობს ყველა საჯარო სკოლაში, ხოლო ხუთ საბავშვო ბაღში ბავშვების გამოუცხადებლობის გამო სასწავლო პროცესი გადაიდო.
ყველა მუნიციპალიტეტში მუშაობს საგანგებო შტაბები და ცხელი ხაზი. ყველა შემოსულ ზარზე გამგეობები მყისიერ რეაგირებას ახდენენ.
