"სამოქალაქო პლატფორმა - ახალი საქართველო" აფხაზეთში ომის დაწყების დღეს განცხადებით ეხმიანება :
„24 წლის წინ 14 აგვისტოს, აფხაზეთში საბრძოლო მოქმედებები განახლდა. საომარი მოქმედებები, რომელიც 13 თვე და 13 დღე გრძელდებოდა, 1993 წლის 27 სექტემბერს, სოხუმის დაცემით დასრულდა.
ამ „ძმათამკვლელ „ ომში, რომელიც მოსკოვის ხელშეწყობითა და ქართველი დ აფხაზი პოლიტანების უგუნურობით მწვავე დაპირისპირებაში გადაიზარდა, ათასობით მოქალაქე დაიღუპა, მათ შორის - სამხედროები და მშვიდობიანი მოსახლეობა. საცხოვრებელი სახლების იძულებით დატოვება 300 ათასამდე ადამიანს მოუწია.
სამწუხაროა, რომ 24 წლის შემდეგაც, ჩვენ ვერ მოვახერხეთ იძულებით დევნილების საკუთარ სახლებში დაბრუნება. 24 წლის შემდეგაც, მიუხედავად არაერთგზის შეთანხმებისა, რუსეთი კვლავ განაგრძობს ქართული ტერიტორიების მცოცავ ოკუპაციას.
გამოვხატავ ღრმა პატივისცემას იმ ადამიანების მიმართ, რომლებმაც თავი შეწირეს საქართველოს ტერიტორიული მთლიანობისთვის ბრძოლას.
კიდევ ერთხელ ვუთანაგრძნობ გარდაცვლილთა და უგზო-უკვლოდ დაკარგულთა ოჯახებს.
ამ ადამიანებმა, საკუთარი გმირობითა და თავდადებით, ისტორიაში დატოვეს წარუშლელი კვალი. ჩვენი მოვალეობაა, ყოველთვის გვახსოვდეს ისინი და ღირსეულად შევძლოთ იმ საქმის დასრულება, რომელსაც ერთიანი, ძლიერი და თავისუფალი საქართველო ქვია!
დღეს 300 ათასამდე დევნილია ქვეყანაში, ადამიანები ვერ ახერხებენ, მშობლების, შვილებისა და ნათესავების საფლავების მონახულებას.
მხოლოდ მტკიცე და კონსტრუქტიული პოზიციით, მშვიდობიანი მოლაპარაკებების გზით, ჩვენ შევძლებთ საქართველოს გამთლიანებას!“
