,,პირადად ჩემი - დავით უსუფაშვილის სერიოზული დამსახურებაა, რომ მიხეილ სააკაშვილმა ქვეყანა უფსკრულში არ გადაჩეხა“, - განაცხადა პარლამენტის თავმჯდომარემ გადაცემა „მთავარში” სტუმრობისას. მან ასევე განაცხადა, რომ ,,რესპუბლიკურ პარტიას“ კოჰაბიტაციაში ის ხალხი ადანაშაულებს, რომლებიც ბიძინა ივანიშვილის გვერდით 2012 წლის არჩევნების შემდეგ გამოჩნდა.
"ძალაინ საინტერესოა, რომ კოჰაბიტაციის და ნაციონალების ლობირებას გვაბრალებს ის ხალხი, რომელმაც ნაციონალურ მოძრაობასთან აქტიური ბრძოლა გადაწყიტა 2012 წლის შემდეგ და "ყოჩაღი ბიჭი" მხოლოდ ბიძინა ივანიშვილის გვერდით გამოჩნდა.
ძალიან ხშირად ავიწყდება ამ ხალხს, ვინ იყო ნაციონალური მოძრაობის ყველაზე უფრო აქტიური და თანმიმდევრული ოპონენტი 2004 წლის მაისიდან. ეს ერთი.
მეორე, რომელი იყო ის პოლიტიკური პარტია, რომელსაც ამ სასწაულის მომხდენმა ივანიშვილმა პირველმა დაუძახა, "თქვენი გვერდით დგომა მჭირდებაო."
"რესპუბლიკელები", ეს იყო პარტია, რომელსაც სჯეროდა, რომ ხელისუფლება არჩევნების გზით უნდა შეცვლილიყო, დანარჩენი პოლიტიკური სპექტრი კი პრაქტიკულად ამის წინააღმდეგი იყო და ამტკიცებდნენ, რომ არჩევნებით არაფერი გამოვიდოდა.
შემდეგ მოვიდა ბიძინა ივანიშვილი და თქვა: "მხოლოდ არჩევნების გზით."
და მას მერე, 2011-2012 წლებში, უამრავჯერ ბეწვზე ეკიდა სიტუაცია, მაგრამ ჩვენ შევინარჩუნეთ ეს გეზი, ეს კი ნიშნავს რომ არჩევნების გზით შეცვლილი ხელისუფლების შემდეგ, ჩვენ ვაღიარეთ არჩევნების შედეგებიც!
არჩევნების შედეგად კი დადგა ის რეალობა, რომ ჩვენი თანამოქალაქეების რაღაც ნაწილმა ისევ "ნაციონალურ" მოძრაობას დაუჭირა მხარი, ეს ხომ ფაქტია და ეს ხომ ჩვენ ვიცით, ამიტომ მე როგორც პოლიტიკოსი ვალდებული ვარ მათთან მქონდეს ურთიერთობა, მითუმეტეს თუ ისინი პარლამენტში იქნებიან არჩეული.
ყველა მრავალპარტიული პარლამენტი თავის მხრივ დგას კოჰაბიტაციის აუცილებლობის წინაშე.
კოჰაბიტაცია კი, ეს არის თანაარსებობა იმ განსხვავებული პოლიტიკური ძალების, რომლებიც ერთი მაგიდის გარშემო სხედან.
ამიტომ, რა უნდა მექნა მე, როგორც პარლამენტის თავმჯდომარეს?
უნდა გამეყარა ხალხის ერთი ნაწილი? რის საფუძველზე?
რაც შეეხება იმ პერიოდს, როდესაც პრეზიდენტი ჯერ კიდე სააკაშვილი იყო.
მე, ყოველგვარი თავმდაბლობის გარეშე ვიტყვი, რომ დიახ, პირადად ჩემი, დავით უსუფაშვილის სერიოზული დამსახურებაა, რომ იმ ერთ წელიწადში ამ ქვეყანამ იფუნქციონერა და იმუშავა!
გაიხსენეთ , ეს ის დრო, როდესაც კონსტიტუციით მთლიანი ძალაუფლება ჯერ კიდევ პრეზიდენტის ხელში იყო და ჩვენ უნდა მოგვეხერხებინა ის, რომ ეს ქვეყანა უფსკრულში არ გადაეჩეხა სააკაშვილს და დიახ, სწორედ მე ვიყავი ეპიცენტრში და ვაგვარებდი ამ საქმეებს.
დიახ, მე ვიღებ ამ პასუხისმგებლობას და გინდათ ისრები მესროლეთ ახლა, რატომ აკეთებდი ამასო. მთელი იმ ერთი წლის განმავლობაში იყო უამრავი საქმე, უამრავი კრიტიკული, კრიზისული, სიტუაცია. პრემიერი და პრეზიდენტი კი სულ ორჯერ შეხვდნენ ერთმანეთს.
და ვისაც ეს ყველაფერი მიაჩნია დანაშაულად, მე იქით ვთხოვ, რომ ხმა მომცეს კი არა, ხმა არ გამცეს საერთოდ.
და მესამე, ყველამ გაიხსენეთ, ვინ უჭერდა მხარს 2012 წლის ბოლოს, საპარლამენტო საგამოძიებო კომისიის შექმნას. ვინ იყო ამის ინიციატორი და რატომ არ გაკეთდა ეს. ინიციატორი იყო თინა ხიდაშელი, მხარს უჭერდნენ რესპუბიკელები, მაგრამ მაშინ ჩაითვალა, რომ არ იყო იმ ეტაზე საჭირო კომპლექსური, ერთიანი გამოძიება და შედეგების მაგიდაზე დადება, იმიტომ რომ ეგონათ რომ პროკურატურა და პოლიცია მიხედავდა თითოეულ საქმეს ინდივიდუალურად.
სამწუხაროდ არ გამოდგა ეს სწორი ტაქტიკა, იმიტომ რომ ეს ინდივიდუალური საქმეები დაგროვდა და დევს ათასობით, მაგრამ რაც შეეხება მოვლენის, ეპოქის შეფასებას, პოლიტიკური ვერდიქტის დადებას და ამითი გარკვეულწილად დებატების ფორმატიდან მოქმედების ფორმატში გადასვლას, ეს არ გამოვიდა...
ამიტომ, თუ ვინმეს მეხსიერება ღალატობს, მე მზად ვარ შევახსენო ხოლმე, ვის რა როლი ქონდა ყველა ამ პროცესში, ვინ იყო პრინციპული ბოლომდე, ვინ გახდა ვაჟკაცი ასპარეზზე ივანიშვილის გამოჩენის შემდეგ, ვინ იყო ნაციონალების ოპონენტი პირველივე დღეებიდან და ვინ გახდა ნაციონალების ოპონენტი, მაშინ როდესაც პერსონალურად მას შეექმნა პრობლემა."
დავით უსუფაშვილი გადაცემა „მთავარი“.
