საქართველოს ექსპრეზიდენტი მიხეილ სააკაშვილი საიას მიერ მისი დაჯარიმების შესახებ გაკეთებულ განცხადებას სოციალური ქსელით ეხმაურება და აცხადებს, რომ მისთვის კანონი უზენაესია, თუმცა იხსენებს ოთარ ჭილაძის ფრაზას: “მე დაკარგულად ვერ ჩავთვლი იმას, რაც ჩემი ნებით არ დამითმია”.
,,ცოტათი მიკვირს, რომ საქართველოს ახალგაზრდა იურისტთა ასოციაციას, რომელსაც ნამდვილად დიდ პატივს ვცემ, აქვს იმდენი დრო და რესურსი, რომ საქართველოში არსებული სრულიად უკანონო ვითარების ფონზე, როდესაც ყოველ ფეხის ნაბიჯზე ილახება ადამიანების უფლებები, აშინებენ მოსამართლეებს და ხდება მოქალაქეების დატერორება, აანალიზოს ჩემი გამოსვლები და მიმართვები.
გთხოვთ, გაიხსენოთ, რის საფუძველზე ჩამომერთვა მოქალაქეობა და ჩაუღრმავდეთ ამ გადაწყვეტილების ნამდვილ მიზეზებს. კანონი უზენაესია ჩემთვის, თუმცა, ოთარ ჭილაძის ფრაზა მახსენდება: “მე დაკარგულად ვერ ჩავთვლი იმას, რაც ჩემი ნებით არ დამითმია”. სადაც არ უნდა ვიყო, რომელ ქვეყანაშიც არ უნდა ვმოღვაწეობდე, მე ვრჩები ჩემი ქვეყნის ერთგული. საქართველოს მოქალაქეობა რუსი ოლიგარქის მარიონეტების მიერ ხელმოწერილი ფარატინა დოკუმენტით არ განისაზღვრება.
ვერანაირი ჯარიმა ვერ შემაშინებს, რომ ვებრძოლო იმ დიდ უსამართლობას, რომელიც ახლა ჩვენს სამშობლოშია”, - აცხადებს ოდესის გუბერნატორი.
საქართველოს ახალგაზრდა იურისტთა ასოციაცია წინასაარჩევნო აგიტაციაში მონაწილეობისთვის, მიხეილ სააკაშვილის 2 000 ლარით დაჯარიმებას მოითხოვს. აღნიშნული მოთხოვნით, საიამ აჭარის უმაღლეს საარჩევნო კომისიას მიმართავს და კანონმდებლობას განმარტავს, რომლის თანახმადაც, უცხო ქვეყნის მოქალაქეს წინასაარჩევნო აგიტაციაში მონაწილეობა ეკრძალება.
