საქართველოს ექსპრეზიდენტმა მიხეილ სააკაშვილმა ბათუმში „ნაციონალური მოძრაობის“ მაჟორიტარობის კანდიდატების წარდგენის ღონისძიებაზე შეკრებილ მოსახლეობას მიმართა და განაცხადა, რომ მისი დასაყრედენი აჭარაში ლევან ვარშალომიძეა. ოდესის გუბერნატორმა მოსახლეობას სთხოვა კიდევ ერთხელ მისცენ მას მანდატი.
სააკაშვილმა აჭარაში 2004 წლის მაისში განვითარებული მოვლენები გაიხსენა და ხალხს მადლობა გადაუხადა აჭარის მთავრობის მაშინდელი თავმჯდომარის, ასლან აბაშიძის თანამდებობიდან გადაყენებაში დახმარებისთვის.
ექსპრეზიდენტმა ბიძინა ივანიშვილიც გააგრიტიკა და განაცხადა, რომ ეს ოთხი წელიწადი ივანიშვილს ჰქონდა განსაკუთრებულად ცუდი დამოკიდებულება აჭარის მიმართ მარტივი მიზეზის გამო.
,,ყველაფერს ჩემს ჯიბრზე აკეთებდა იმიტომ, რომ მე მქონდა კარგი დამოკიდებულება, - აღნიშნა მიხეილ სააკაშვილმა ვიდეომიმართვაში.
"ნაციონალურმა მოძრაობამ" გუშინ საქართველოს პარლამენტსა და აჭარის უმაღლეს საბჭოში ბათუმის მაჟორიტარობის კანდიდატები წარადგინა.
ბათუმიდან საქართველოს პარლამენტში კენჭს იყრიან ქალაქის სამი ოლქიდან კანდიდატები მირდატ ქამადაძე, გიორგი კირთაძე და თემურ დუმბაძე. აჭარის უმაღლეს საბჭოში მოსახვედრად კი ელგუჯა ბაგრატიონი, ნინო ჯინჭარაძე, გია აბულაძე იბრძოლებენ.
