არასამთავრობო ორგანიზაციები 8 ოქტომბრის საპარლამენტო არჩევნებთან დაკავშირებით, სახელმწიფო უწყებების, პარტიებისა და მედიაორგანიზაციების მიმართ მოწოდებას ავრცელებენ.
„მივმართავთ სამართალდამცავ უწყებებს უზრუნველყონ არჩევნებში ჩართული მხარეების უსაფრთხოება, პოლიტიკური ნეიტრალიტეტის სრული დაცვით შეასრულონ მათზე დაკისრებული მოვალეობები, მივმართავთ სახელმწიფო უსაფრთხოების სამსახურს არ დაუშვან პოლიტიკურ პარტიების საქმინაობაში ჩარევა, ან და ზეგავლენის მოხდენა საარჩევნო გარემოზე. მივმართავთ იუსტიციის სამინისტროს, რომ უზრუნველყოს საერთაშორისო კომისიის ეფექტური და მიუკერძოებელი მუშაობა, არ წარმოქმნას ხელოვნური ბარიერები და უზრუნველყოს სახელმწიფო აუდიტის სამსახურის ხელმისაწვდომობა შესაბამის მონაცემთა ბაზებზე. მივმართავთ საარჩევნო ადმინისტრაციას, განსაკუთრებული ყურადღება მიაქციოს საარჩევნო და ადმინისტრაციული რესურსების გამოყენებაზე რეაგირების საკითხს, ჯეროვნად განიხილოს შემოსული საჩივრები, რათა არ გაჩნდეს კითხვები ამ უწყების მიუკერძოებლობასთან დაკავშირებით, ხელი შეუწყოს სადამკვირვებლო ორგანიზაციებისა და სხვა დაინტერესებული მხარეების მუშაობას. მივმართავთ საარჩევნო ადმინისტრაციას ხელი შეუწყოს სადამკვირვებლო ორგანიზაციებისა და სხვა დაინტერესებული მხარეების მუშაობას, განსაკუთრებული ყურადღება დაუთმოს საარჩევნო პროცესში ეთნიკური უმცირესობებისა და შეზღუდული შესაძლებობის მქონე პირების ჩართულობას. მივმართავთ სახელმწიფო აუდიტის სამსახურს ეფექტური და მიუკერძოებელი ზედამხედველობა განახორციელოს პარტიების დაფინანსებაზე და პერიოდულად საზოგადოებას აცნობოს მონიტორინგის შედეგების შესახებ. მივმართავთ პოლიტიკურ პარტიებს წინასაარჩევნო კამპანია წარმართონ საარჩევნო პროგრამების საფუძველზე, წინასაარჩევნო კამპანია დააფუძნონ პოზიტიურ დღის წესრიგზე და მაქსიმალური აქცენტები გააკეთონ სამომავლო გეგმებზე, განსაკუთრებული ყურადღება დაუთმონ ეთნიკური უმცირესობების ინფორმირებას საკუთარი წინასაარჩევნო პროგრამების შესახებ, უზრუნველყონ საარჩევნო სიებში ქალთა ადეკვატური მონაწილეობა, ეთნიკური უმცირესობების წარმომადგენელთა წარმოჩენა, თავი შეიკავონ აგრესიული ქმედებებისგან და პროვოკაციებისგან, ასევე მსგავს ქმედებებში პარტიის აქტივისტების ჩართვისგან, უარი თქვან ოპონენტების დისკრედიტაციაზე, მათ შორის პირადი ცხოვრების ან სხვა ტიპის ინფორმაციის გავრცელების გზით, პატივი სცენ ადამიანის უფლებებს და გაიზიარონ სამართლებრივი, სეკულარული და დემოკრატიული სახელმწიფოს მშენებლობის მნიშვნელობა, უარი თქვან სიძულვილის ენის გამოყენებაზე, ასევე ქსენოფობიურ და ჰომოფიბიურ განცხადებებზე, გაიზიარონ პასუხისმგებლობა არჩევნების მშვიდობიანად ჩატარებაზე და იმაზე, რომ არჩევნების არადემოკრატიულად ჩატარება გავლენას მოახდენს საქართველოს სახელმწიფოს შემდეგ განვითარებაზე და მისი ევროინტეგრაციის მომავალზე, კეთილსინდისიერად და გამჭვირვალედ კანონის მოთხოვნების დაცვით მოახდინონ წინასაარჩევნოდ ფინანსების განკარგვა და უარი თქვან ამომრჩევლების მოსყიდვაზე. მივმართავთ მედიაორგანიზაციებს მიუკერძოებლად გააშუქონ წინასაარჩევნო კამპანია და არჩევნები დღის მიმდინარეობა, ამომრჩეველს მიაწოდონ ინფორმაცია პოლიტიკური პარტიებისა და კანდიდატების საარჩევნო პროგრამებთან და დაპირებებთან დაკავშირებით, ამომრჩეველს მიაწოდონ მიუკერძოებელი, ფაქტებზე დაყრდნობილი ინფორმაცია, არ მიმართონ პოლიტიკური პარტიების განზრახ დისკრედიტაციას, უზრუნველყონ საარჩევნო პერიოდში პოლიტიკური პარტიების მედიაზე თანაბარი ხელმისაწვდომობა“, – ნათქვამია განცხადებაში, რომელსაც 42 არასამთავრობო ორგანიზაცია აწერს ხელს.
