პარლამენტის თავმჯდომარე დავით უსუფაშვილმა, ფრაქციის გაფართოებული სხდომის დასრულების შემდეგჟურნალისტებტან განაცხადა, რომ რესპუბლიკელ მინისტრებს საქმეების დასრულებისთვის დრო სჭირდებოდათ და ვარშავის სამიტი საამისოდ ერთ-ერთ თარიღად იყო მოცემული. მისივე თქმით, ძალიან მკაფიო და ზუსტი განცხადებები სამომავლო გეგმებზე უახლოეს დღეებში გაკეთდება.
" ჩვენ ვთქვით, რომ “რესპუბლიკური პარტიის“ მთავრობის წევრები თანამდებობებზე გააგრძელებენ ყოფნას, ვიდრე ჩვენი პოლიტიკური დღის წესრიგი ან პრემიერ-მინისტრის გადაწყვეტილება სხვა რამეზე არ მიანიშნებს. ყველა მათგანს ძალიან მნიშვნელოვანი საქმეები ჰქონდა დასასრულებელი. ჩვენ თავიდანვე ძალიან მკაფიოდ ვამბობდით, რომ ვემსახურებით საქართველოს, სახელმწიფოს და არა კოალიციას ან “რესპუბლიკურ პარტიას“.
ამ საქმეების დასრულებას სჭირდებოდა გარკვეული დრო. ვარშავის სამიტი საამისოდ ერთ-ერთ თარიღად იყო მოცემული. დანარჩენ დეტალებზე ძალიან მალე “რესპუბლიკური პარტია“, მისი ხელმძღვანელები ძალიან მკაფიო და ზუსტ განცხადებებს გავაკეთებთ. ეს არის დღეების საქმე, აღარ არის კვირების საქმე“, - აღნიშნა დავით უსუფაშვილმა.
რაც შეეხება ჟურნალისტის დასმულ კითხვას რომლის მიხედვით, თინა ხიდაშელმა შესაძლოა “რესპუბლიკურ პარტიაში“ საქმიანობა არ გააგრძელოს და ამ პირობით დარჩეს თავდაცვის მინისტრად, უსუფაშვილმა ,,უხერხული” უწოდა. “სხვა რამეც ხომ არ გაგიგიათ?! ოჯახური საქმიანობის შეწყვეტასაც ხომ არ აპირებს?! მისვამთ კითხვებს, რაზეც პასუხის გაცემა, უხერხულია. ნუ სვამთ ისეთ კითხვებს, რომელსაც თავად თუ მოუსმენთ, ცოტა უხერხული მოსასმენიც კია“, - განაცხადა უსუფაშვილმა.
