12 დეკემბერს, 13:00 საათზე, ოპერისა და ბალეტის თეატრში სერგო ქობულაძის ფარდის ესკიზის ასლი დაიკიდება. ღონისძიებას საქართველოს კულტურისა და ძეგლთა დაცვის მინისტრი მიხეილ გიორგაძე, ოპერისა და ბალეტის თეატრის ხელმძღვანელი დავით კინწურაშვილი, საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმის დირექტორი გიორგი კალანდია, სამხატვრო აკადემიის პროფესორი ნანა იაშვილი და სერგო ქობულაძის მოსწავლეები - თემო გოცაძე და რადიშ თორდია დაესწრებიან. თანამედროვე ციფრული ტექნოლოგიით გადიდებული ფარდის ასლი გერმანიიდან საქართველოში 11 დეკემბერს ჩამოვიდა.
სერგო ქობულაძის ესკიზის მიხედვით აღდგენილი ასლი ოპერის სცენის ძირითადი ფარდის უკან ეკიდება და მისი ნახვის საშუალება ოპერისა და ბალეტის თეატრის რეაბილიტირებული შენობის გახსნის შემდეგ ყველა მისულ სტუმარს ექნება. მას შემდეგ რაც გადაწყდა, სერგო ქობულაძის ცნობილი ფარდის აღდგენა, საქართველოს კულტურისა და ძეგლთა დაცვის მინისტრმა მიხეილ გიორგაძემ, კონსულტაციის მიზნით, მოიწვია მხატვრის მოსწავლეები და მასთან დაახლოებული პირები (თემო გოცაძე, რადიშ თორდია, (მოსწავლეები), თაზო ხუციშვილი, მურაზ მურვანიძე). მხატვრები ერთხმად შეთანხმდნენ, რომ სერგო ქობულაძის ტექნოლოგიით ამ ფარდას ვერავინ დახატავდა, ამიტომ გადაწყდა, ფარდა დაბეჭდილიყო მსოფლიოში ყველაზე თანამედროვე ციფრული ტექნოლოგიით - გერმანიის ქალაქ პოტსდამში კომპანია „Gerriets” მიერ. „გაციფრულებაზე“ მუშაობდა სამხატვრო აკადემიის პროფესორი მედიახელოვნების მიმართულებით ნანა იაშვილი.
სერგო ქობულაძის თანამედროვე ციფრული ტექნოლოგიებით გადიდებული ფარდის ასლი, მხატვრის ერთ-ერთი ასისტენტის ესკიზის მიხედვით არის შექმნილი. აღნიშნული ესკიზი კულტურის სამინისტრომ შეისყიდა და გადასცა საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმს. პირველი ფარდის ესკიზიც (რომელიც სრულად დაიწვა) ასევე დაცულია „ხელოვნების სასახლეში“.
