საქართველოს შინაგან საქმეთა მინისტრის ვანო მერაბიშვილის განცხადებით, პოლიციის დღესთან დაკავშირებით დაგეგმილ აღლუმს პოლიტიკასთან საერთო არაფერი აქვს.
"არც ერთი მცდელობა, რომ პოლიცია პოლიტიკურ საქმიანობაში ჩაებას, არ გაამართლებს. შარშან, მთელი წლის განმავლობაში იყო არაერთი მცდელობა, პოლიცია ჩაერთოთ პოლიტიკურ დაპირისპირებაში. ჩვენი მიზანი კი არის ის, რომ საქართველოში პოლიცია საზოგადოების ნდობით სარგებლობდეს. ამიტომ, ნებისმიერი მცდელობა, ვისიც არ უნდა იყოს, ჩარიოს პოლიცია პოლიტიკურ დაპირისპირებაში, უშედეგოდ დასრულდება, რადგან პოლიცია იყო და დარჩება საზოგადოებაში ერთ-ერთ ყველაზე ავტორიტეტულ სახელმწიფო ორგანოდ", _ განაცხადა შინაგან საქმეთა მინისტრმა ვანო მერაბიშვილმა ტელეკომპანია "რუსთავი 2"-სთვის მიცემულ ინტერვიუში.
ამასთან, მერაბიშვილის განმარტებით, პოლიციის პროფესიულ დღეს ჩატარდება არა კლასიკური, არამედ "რიტუალური პოლიციური აღლუმი", რომელშიც მონაწილეობას შინაგან საქმეთა სამინისტროს თანამშრომლები მიიღებენ. ასევე აღლუმისთვის გამოყენებული იქნება ავტომობილები და სხვა ტექნიკა.
"პოლიციის დღედ 6 მაისის გამოცხადება - ეს იქნება მომგებიანი ყველასთვის ხალხისთვისაც და პოლიციელებისთვისაც, მით უმეტეს, რომ დღეს პოლიცია საზოგადოების ძალიან მაღალი ნდობით სარგებლობს. ჩვენ გვინდა, რომ პოლიციელებმა და ხალხმა ერთად იზეიმონ ეს დღესასწაული", _ განაცხადა შინაგან საქმეთა მინისტრმა და აქვე დასძინა, რომ მათი სურვილი იყო პროფესიული დღე შეცვლილიყო და საბჭოთა მილიციის დღესასწაულთან კავშირი არ ჰქონოდა.
"10 ნოემბერი საბჭოთა მილიციის დღე, 30 ნოემბერი კი საბჭოთა "ჩეკას" შექმნის დღე იყო. ჩვენ ყველანაირად ვცდილობთ არაფერი გვქონდეს საერთო ამ ორ საბჭოურ სისტემასთან", - აღნიშნა მერაბიშვილმა.
